"Sapilitan yung ipatuknang ing palage,” ngarang minulit ding sundalus.
Giluta’nong Don Filipo. Meko la ring sundalus. Ban e mayalinlangan ing palage e na sinabing Don Filipo ing milyari agyang kaninu.
Kaybat ning makuyad a sarswela a pikpakan da ring manalbe, linto ya ing Prinsipi Villardo at inamu' nong tabakan ding morus a minihag kang tata na. Ing bayani bela'nong pututan a batal ila ngan king misan mung tabak at malaus nong ibasibas king bulan nung é la tupad king adwa'na.
Salamat na mu, inyang ding morus magsadya nong makilaban at bagaya'na sana ning musika nang Riego, mika inge. Ding titigtig tinuknang la at memanlundag king entablado at pemaliswag do ring karelang instruments Ing matapang a Villardo inyang atiglapa'no ring magugulung tau bala'ua kampung do ring morus inya inukul na na ing tiplad. Belabag ne ing kikinang nang espada at saka ne milai. Inyang ikit ding morus ing milai ya itang milalu katapang a Villardo, ila man linutas da na ing pakyapusan de at milulululu lang linigtas. Kanita na meramdam ing gulisakan, ing mangalalam a ay! bulyawan, panagkasan ding pupulaing tau. Ati'nang mengadamusak, ati'nang mengapatanan. Mitda la ring sulu, sinulapo la ring suluging mitatau, at aliwa pa. “Ding tulisan. . .! ding tulisan...!” ngarang gugulisak ding mapilan. “Barilan yu la.. . barilan yu la...!” ngara naman ding aliwa. Ding anak at babai pasikyak la, kabang durugang la king lapag misusumangid ding bangku at ding manalbe busal na nitang inge at kagulwan.
Nanu wari ing milyari?
Ding adwang gwardya sibil penagal dong barug ding musikus ban mituknang ing palage. Ing tininti mayul, kambe ring pulis a paka-espadang luma, ikwa rong asupil ding gwardya sibil bista man deta linaban la.
"Idala yo king tribunal!” nganang gugulisak Don Filipo. “Mimingat kayu, ban e la mabulus.”
Mibalik ya i'lbarra at panintuna’ne i'Marfa Clara. Ding mengatakutan a dalaga tinaid la kaya kabud ikit de. Gagalgal la’t maputla. I'Tya Isabel pangadi ne ing Kyrie-eleison king latin.
