wari i’Ibarra, darala ne karing takde na i'Maria Clara
king pangabungsul na at deti limbug la king karalumduman.
Tinipa yang magluksu karing balitang, alang kupya, alang tukud, at anti mong mamulang, milai yang papunta king plasa.
Karin disa'no ring kastilang mangamanu karing sundalus. Linawe no ring liklukan da ri Maria Clara ampon ding kakalugura'na at deti ala nong laman.
"Padre. . .! Padre. . .!” ngarang gugulisak mamaus kaya ring kastila, dapot e no pinsingan at milai yang papunta king bale nang Kapitan Tiago. Karin, mipasno ya. Ketang malino kortina, makalarawan ya ing anino nang malagu, mipnung ampat at mayubung Maria Clara at ing dara nang magdalang tasa at kopa.
"Dyaskes..." ngana, mekad mebigla ya mu ketang ikit nang kagulwan.
Kebat nong Tya Isabel ding persyana ring awang at e na ne ikit ing makawiling larawan.
Meko ya king lugal a ita ing kura at e na no pinsingan man ding pakapulung a tau.. Atyu king kaukula'na ing larawa'nang mamihag ning metung a dalagang matudtud maimbing. Ding talukab nang mata padurutan da la ring makabang irap a malantik a katulad da ring karing birhen a gagawa'nang Rafael. Itang malati nang asbuk titiman ya at itang lupang ita larawa’ne ning kalinisan, ning kealan malit at ning kawagasan. Itang lupang ita metung yang anino maningning busal nitang maputi nang imalan ning pagkera’na, anti mong metung a angel libutad ning biga. Ing pamanagimpa'na manakit pang dakal a bage dapot, ninung talasulat ing malyaring milarawan king akakit ning managimpan?
Mapalyaring ing talapahayag (periodista) asulat na iti kaybat nang lerawan ing sigla ning pista at ing sablang ikit nang milyari. At oyta ing paninapa’nang ipabulalag ning kura dikil king kayang sarili a tutung marayu king katutwan.
Salamat, at alang kapupusan a kapasalamatan king mayap a pamakyalam ning kagalang-galang a Padre Salvi, itang pali rang buntuk ding tau agad nang mepawi. E na pitakutan ing panganib migsubu ya at itang amanu nang paniwalan da at ketang upaya na't
