I’lbarra e na balu ing dapta’na. Ing amyam ning kabengyan a dirimla na king panaun a ita balamu papaid na ing ditak a ulap a babye lulam king kaysipa'na.
Leko ne ing kupya na at mengisnawa yang malalam. Lalabas lang masalusu ring karwahi, king kalesang pakyupa naman patuk-patuk la pulayi at anti mu rin daralan la ring taung myayaliwa lahi. Linakad ya at pepaynturu king plasa ning Binunduk. Maglalawe ya misusumangid anti mong ating panintunan. Ila naman ding sadyang dalan, ila naman ding bale a pinin tan maputi at asul, ding pader a pilisan dang albearding maputi a pakilupa ra karing batung masyas. King simboryu ning pisamban atyu pa ing relos a maki lupang kikislap. Ila naman ding tindahan intsik a maki kortinang marinat at rehas a bakal. Ing metung ka ring rehas a reti beluktut de misan a bengi, bilang pamakyapus karing anak a malitun ning Menila. E re pa tinulid angga ngeni.
“Kabagal na lakad ning sabla!” nganang bubulung at tinaglus ya king dalan Sacristia.
Ding sadyang magtindang sorbeti ya rin ing kulait da: sorbetee.. . sorbetee. ..! Kabang ding mamasuk a paritan ila pang sulugi ra ding magtindang intsik at ding babaing magtindang kapangan at prutas.
"Makapagmulala! ” ngana. “Pitung banwa ing milabas at ya naman ing intsik a kakilala ku. . . at itang matwang babai... ya naman. ..! Ngening bengi asabi kung balamu wari meninap ku mung pitung banwa Europa! At matas, a banwa... itang banketang sira
inyang mako ku angga ngeni e pa melarin.”
