King kamatutwanan itang mepirasung batu ning
banketa king kantu ning dalan San Jacinto at Sacristia
angga ngeni e pa mitaid.
Kabang pigunamgunama’na iting e mamalis nang itsura ning lungsud king bansang alang karatunan, metung yang gamat ing malale mipatung king pago na. Minatna ya at akarap ne ing matwang tenyente a maratnang makalawe kaya. Makatiman ya at ala king lupa na itang masyas nang aske ning militar ampon ing ugali nang makakulurun mung makakulurun a kile.
"Kuyog ,mimingat ka! Dapat na kang mika lisyun king milyari kang igpa mu!” ngana.
"Ipanupaya yu . . . king ayntindyan ku, kekaluguran yeng mayap ing pengari ku. Malyari yung sabyan kaku nung nanu ing meging kapalara'na?” ing kutang nang Ibarra.
"E mu kamalayan?” nganang mipamulalang kinutang ning militar.
"Kitang ku yan kang Don Santiago, dapot e na pengakung isalita kaku nune bukas pamu. Ikayu wari balu yo?”
"Balu ku, anti mo ring sabla! Mete ya king sukulan!”
Mipaurung yang katakbangan i’lbarra at linawe neng maratna ing tenyente.
"King sukulan! Ninung mete king sukulan?” ing kutang na.
"E kasi i’igpa mo! Mesukul ya! nganang mekibat ning militar.
"Igpa ku . . . king sukulan . . . mesukul ya? Nanung sinabi yo? Kakilala ye ing pengari ko? E ko . . .” nganang kinutang Ibarra at sikmal ne takde ing militar. “Ukulan kung e ku migkamali, i’Don Rafael Ibarra!”
"Ya pin, i'Don Rafael Ibarra! nganang minulit malale.
"Bala ku kamalayan mu!" nganang tinuglung mipnung lunus ning militar kabang titimalara'na ing mipapate kilub nang salung Ibarra. "Aku inukul kung ... e ka paysupil, siknangan mu ing lub mu. . . Keti e
ka mibilang marangal a tau nung e ka linub king sukulan!"
