“Ya ping bage na!" nganang misundung Donya Victorina, anti mong e na dindam ing sinabi nang Padre Salvi. “Ing babaing ita bina yang makasnuk! King pisamban ala yang daraptan nune ing makalawe kaku. Masala ing kalupa rya naman ding dakal. Keng dominggo ikutang ku kaya nung atin kung songgu king lupa,dapot, ninung mibababang makipagsalita karing taung alang ulaga?”
Ing kura, anti mong e na naman dindam iting salita, nganang tinuglung.
"Paniwalan yu ku, Don Santiago, ban lubus yang kumayap ing kekong anak kaylangan ing magkomunyun ya bukas; pagdala keng byatikd. . . isipan ku ing ala yang ikumpisal, dapot makanyan man.. . nung bisa yang magkumpisal ngening bengi...”
"E ku balu,” nganang agad tinuglung Donya Victorinang migsamantala king sinaguling pamita’ning sa lita ning kura, “e ku balu nung baket ating lalaking makapakyasawa karing makanyan a itsurang babai, anti mo ing babaing ita. Agyang king makarayu makilala nung nanu ing penibata’na; mayayakit ing mamamate ya king dirya. . . Akakit yu, nanu ing akwa ning metung a alperes?”
"Uli niti, Don Santiago, sabyan yu king kekong pisan ing isadya ne ing masakit king komunyun bukas. Datang ku potang bengi ban ikabus ke karing mangalati nang kasalanan...”
At inyang akit nang i’Darang Isabel lulwal ya, ngana kaya king tagalug:
“Isadya ye ing kekong pangunakan ban magkumpisal ngening bengi; bukas atdanan keng byatiku, kanita kumayap yang malagwa.”
"Dapot, Padre,” nganang mengangas malamarme Linares, "pota galang isipa'na ing makapanganib yang mate...”
“E ko migaganaka!” nganang mekibat e maglalawe ning kura, "balu ku ing daraptan ku. Minantabe na ku karing dakal a masakit. Subali pa king ya sabya’na nung bisa ya o ali king banal a komunyon, at akit yu nung makananung mayag ya ngan kaniti.”
Keta mu ring penandit i’Kapitan Tiago mekibat yang wa king sabla.
