Lalam na nitang maynang-sala a papalsut ning bulan busal ding makapal a sanga ring dutung, ing metung a lalaki maglakad ya king pulu king takbang a banayad at maingat. Balang mapilan penandit, anti mong ba'nang abitasa ing bili karin, papasyuk ne ing ditak nang dake ning metung a é karaniwan a tigtigan, at kaniti makibat ya ing metung a makarayu king makanyan mu namang pasyuk. Ing lalaki matingid yang makirandam, at kaybat isulung na ing kayang lakad king nayun ning makarayung pasyuk.
Bandang tawli, kaybat ding dakal a pamagkasakit a yampang na king bengi ning pulung e pa metagin, miras ya king malating karinan a alang dutung, tatangara'ning bulan king mumuna nang kapat a dake. Ding mangatas a batu a lililungan ding dutung makatalakad la makapatulug anti mong sirang ampiteatru; ding dutung a bayu pa mung mekutud, ding pun a meging karbus kakatmwan de ing kapitna, maging kalupa ring mangaragul a batung tatakpa'na ning berdeng bulung at dikut.
Ya pang panyatang na niting tau inyang ing aliwa naman a biglang linage ibat guguluta'ning maragul a batu, memagut rebolber, segana’ne at ngana:
"Ninu ika?” king sabing tagalug at siwalang mayupaya, saka ne kesa ing kayang rebolber.
"Kayabe ye ing matwang Pablo?” nganang kinutang ning mumuna king siwalang panatag, e mekibat king kutang at alang dit'mang takut.
"Ing kapitan ya ing sasabyan mo? Wa, atyu.”
"Dale sabyan mu panintuna'neng Elias,” ngana ning lalaking e aliwa nune ing malihim a piloto.
