“Ikayu i’Elias?” nganang kinutang migdalang kalangalang ning metung at linapit ya. E ne leko pangatutuk ing kayang rebolber, nung makanyan . . . meko keni.”
Tikya'neng Elias.
Linub la king metung a anti mong kwebang pay baba king kalalama'ning gabun. Ing minimuna, a maki balu king dalan, sasabya'na king piloto nung kapilan ya dapat kuldas, duku o mamandal. Makanyan man, é la binang melambat miras la king metung a anti mong sala, a bagya ra mu apapasalan ding sulung mitatau king birya. Karin ating labing adwa o labing lima katau a pawang sandatahan, mangarinat a lupa at piblas a makatakut. Ding mapilan pakalukluk la, ding aliwa pakakera, halus e la mipagsalita. Makapaynawa gamat king metung a batung magagamit anti mong mesa, at tahimik magumasid king sulung babye binang dimut a sala ketang dakal nang tutung asuk, mayayakit ya ing metung a matwang lalaking malungkut a panaske, makatali buntuk king metung a imalan a madaya. Nung e tamu balung ita lukib de ring tulisan, sabyan tamu, ngening akit ta ing kealan kapanayan a makalarawan king lupa ning matwa, king ya ing Tore ning Danup ketang kabisperasan a nung kapilan i'Ugalino penga'no ring kayang anak.
King panyatang nang Elias ampon ing kayang talataid, ding atyu karin mibalikwas la, dapot king metung nang sinyal ning tawli migpanatag la at pegumasdan da nya mu ing piloto a ketang penandit a ita alang nanu mang sandata.
Ing matwa makakalale neng belikid ing lupa na at ikit na ing tahimik nang panaske Elias a makalawe kayang alang kupya, mitmung lungkut at masabal.
"Ika?” nganang kinutang ning matwa, ding mata na anti lang kinislap inyang akilala ne i’Elias.
"Makananu ko biling disan ku!” nganang maynang minyabing Elias at piling ne ing kayang buntuk.
Ing matwa tahimik neng diku ing kayang buntuk, sininyal ya karing atyu karin at deta pesilako la, dapot linawe re pamu dagul at pamikakatawan ing piloto.
"Wa,” nganang minyabi kang Elias ning matwa inyang magdilidili na la. "Ati’nang anam a bulan inyang ampunan da ka keta bale. Aku kanita ing malulu-
