nus keka. Ngeni ing kalma miyaliwa at ika ing malulunus
kanaku. Dapot luklu'ka at sabyan mu kaku nung
makananu kang miras keti.”
"Ati'nang labing limang aldo ibat ketang sabyan da kaku ing kekong desgrasya,” nganang mekibat banayad ning anak king siwalang mayna at makalawe king sala. "Agad kung linakad at penintun dako karing mapilan bunduk. Alibutan ko halus ding adwang lalawigan.”
"Ban é patulung daya ring alang malit, mepilit kung meko. Ding kasalang ku tatakut lang marap at ding pakilaban da ila mu ring pakakalulung alang nanu mang depatan a marok kanaku.”
Kaybat ning makuyad a pamagumasid nang Elias karing pamisip a daralan king makakuluru'nang lupa ning matwa, nganang mekibat.
"Dinatang ku ba'kung isangguni kekayu ing metung a bage. Pauli ning e migtagumpe pamanintun ku karing mitagan king sapning mekapauli king pangapalulung ning kaku, inari ku ing mako king lalawigan a nung nu ku magkabyayan, ban munta bandang pangulu at karin manatiling kambe ring tapuk a e sasalpantaya at magsasarili.
"Buri yung lakwan ing bye pigmulan yu at tuki ko kako? Aku maging anak yu ku, pauli ning mewala la ring sapni yu at aku ala ku kareti, ikayu ing kakung maging igpa.”
Ing matwa piling ne ing kayang buntuk at ngana:
"King kakung twa, potang gawa kung makahale takbang a anti mo iti, pauli na ning ita ya na mu ing marapat. Ing metung a taung anti mo aku a milabas king kayang kayanakan ampon ing ganap nang ketwan magsadya king kayang payntungul ampon ketang karing kayang anak; ing metung a taung mapanusig king sablang kaburyan ding makatas kaya king tungkul, tapat tinupad karing mangabayat nang tungkul, mibata king sabla ban makapagkabyayan king lalung katahimikan a malyari; potang iting tau, a nung kenu daya peparimla ning panaun, payngguluta'na ing sabla nang milabas ampon ing sabla nang payntungul karing kabud labi na ning kutkutan, pauli na ning binalak na nang ganap king ing katahimikan alang kapalyaryan at aliwa ing kakayapkayapan!”
