“Baket magkabyayan salanta king aliwang balayan? Mika atin kung adwang anak a lalaki ampon metung a babai, metung a pibalebale ampon pibandyan; pakundanganan at kaluguran ding malda; ngeni anti ku mong dutung a leko ra sanga, maglakbe tipastipas, tataludturan dang anti mong lasip king pulu, at iting sabla, baket? Pauli ning ing metung a tau lepastanganna'ne ing kakung anak a babai. Pauli ning ding kapatad a lalaki minyawad lang kapaglarinan ketang kapaslanga’ning taung ita, at pauli ning itang tau makabili yang makatas karing aliwa uli ning lagyung pekakatawa'ne ning Dyos. King sablang ita, aku, ing igpa, akung melapastangan a dangalan king kakung ketwan, penupaya ku ing kalapastanganan, mematawad king kabugsuka'ning kayanakan ampon karing keyna’ning laman, ampon arapa’ning metung a dewakan a é malyaring malarin, nanu ing dapat depatan nune ing magtahimik at sagip ketang mitagan kanaku? Dapot ing paslang mika takut ya king pamamaling ume malyari at pinyangya'na ing pangapalulung ding kakung anak. Balu mu nung nanu ing depat na? Ale? Balu mu king migding-dingali yang pamanako king kumbintu at karing pamisandalyan miyabe ya ing metung kung anak? Ing metung e re ayabe pauli ning ala yu. Balu mu ing pasakit a merapat karela? Balu mu ita uling ya ing malilyari karing balang balen!”
“Aku, aku ikit ke ing kakung anak makabitin king kayang bwak. Aku dindam ko ring kayang gulisak. Dindam ku ing awsa'na ku, at aku, mataloti at makagawi king katahimikan, e ku mika tepangan makamate ni paymate! Balu mu king ing pamanako e mipatunayan, king meyakit ing kapanyiran at anti mong kaparusan ing kura milipat ya mu king aliwang balen, at ing kakung anak mete ya pauli ning tinggap nang pasakit? Ing metung, ing makataga'na mu kaku, é ya mataloting anti mo i'igpa na; at ing tampalasan, migaganakang iting kapatad mamali ya king kamataya’ ning kapatad, king dingdingaling ala yang cedulang anti mong makabalen uling iti akalingwa'neng dela, sinukul de ring gwardya sibil, pepasakitan myayaliwang é na mapibata, mepilit yang magpakamate!”
"At aku, mebye ku pa kaybat nitang é mu nanung kamarinayan, dapot nung é ku mika tepangan ning agpang mamali karing kayang anak, mitaganan ku pang pusung mamali at mamali ku !”
