"Abibitasa ku! Itaya ke ing kakung bale ampon ing kakung kamisa!”
Ketang penandit a ita daratang ya i’Kapitan Tiago. Makapiblas anti mo ring mangaragul a talasugal, kamisang maputing Canton, pantalon lana at kupyang hipihapa. Gulut na makatuki la ring adwang utusan, darala re ing lasak ampon ing metung a manuk a maputi at misnang karagul.
"Sasabya’na kakung Sinang king i'Maria maragul ne kepaldan!” nganang Kapitan Basilio.
"Ngeni ala neng lagnat, dapot mayna ya pa.”
"Mesambut ko nabenge?”
"Ditak; balu ku king ikayu sinambut kayu . . . alben ku nung makabawi ku.”
"Buri yeng ilaban ing lasak?” nganang kinutang Kapitan Basilio, lalwa'ne ing manuk, at inawad ne king magdala.
“Agpang king pusta.”
“Nu anti ing ipusta yu?”
“Kulang king adwa, e ku makilaban.”
"Ikit yu ne ing kakung bulik? nganang kinutang Kapitan Basilio at inaus ne ing metung a taung magdala king malating manuk.
Linawe neng Kapitan Tiago iti, at kaybat neng tinimbang at sinyasat a kaliskis, sibli ne king magdala.
"Nu anti ing ipusta yu?” nganang kinutang.
"Itang ipusta yu.”
"Adwa at limang dalan?”
"Atlo?”
"Atlu!”
"King tutuking laban!”
Ing pulung ding makikalda ampon ding susugal kinalat ing balitang milaban la ring adwang kabalitan a sabungan. Deting adwa atin lang istorya ampon pamang makabulalag. Ding sabla buri rong akit, syasatan ding adwang kabalitan. Memamye lang pamalak, memanula la king kalwala'ning sabung.
Ing inge merakal, meragul ing lingongo, simpan de ing rueda, ding gradas a pagkabilyan ding manalbe pigumgum da la. Ding soltador dela ro king lapag a pilalabanan ding adwang sabungan, metung a inaputi at metung a malutu, makatari na, dapot deti makakaluban la pa. Mararandam la ring gulisak a King maputi!
