kanlap. E pagmulalan king iti ya ing pibuburyan ding
malda.. Ding sabla tutukyan dong maligaga at migaganaka
ring myayaliwa nang takbang ning labanan at
pangkai ating mipapayasyo.
Ing lapag mikalatanan yang bulbul malutu at maputing
mikulayan daya. Dapot ing labanan e ketang
mumunang mekapatulung daya. Ing pilipinu, tutuki
karing patuntu’ning kapamahalan, buri na ing mate ya
o mulai ing metung. King gabun dakal na ing tinulung
daya, ding sagupaan melagad la, dapot ing tagumpe é
pa makabitasa. King katatawlyan, king metung a é
mu nanung pamagkapilit, ing maputi sinagupa ya ban
utasa'ne ing kayang kalaban, apakutkut ne ing kayang
tari king pakpak ning malutu, at mikalait ya pilatan
ding butul. Dapot ing maputi mesugat ya king salu, at
ding adwa, daraya, mengayna, susunga, mikakabit, menatili
lang é kikimut angga king ing maputi mebalag
ya, tutulu daya king tuktuk, sisikad ya't mighingalu.
Ing malutu tinikum no ring kayang pakpak, semasa'na
ing kayang bili, makakalale nong tinikum ding kayang
bitis at pinyak nong malale ding mata.
Kanita ing talapanatul, agpang karing kautusa’ning kapamahalan, inatula’neng minyambut ing malutu. Ing metung a biglang gulisak segana'ne ing atul, gulisak a merandam king meto balen, makaba, pane at menatiling makabang penandit. Ing makarandam ibat king marayu abalu na kanita king ing minyambut ya ing dejadu, ing melakwan, nung ali ing inge e binang melambat. Makanyan ing malilyari karing bansa, ing malating manyambut king maragul, igale na at igale alang kapupusan ing kayang pamanyambut.
"Ikit mo?” nganang Brunong mamalsala king kayang kapatad, "nung peniwalan mu ku ngeni atin tana sanang dinalan a pesus. Uli mu ala kata metung mu mang kwartu.”
E mekibat i’Tarsilo, dapot miglalawe ya makapatulug kaya anti mong atin yang panintunan.
"Oyta makisabi ya kang Pedro,” nganang tinuglung Bruno. "Dirina’neng kwalta. Karakal a kwalta!”
Keta ping penandit i'Lucas bibilanga’no king gamat ning asawa nang Sisa ring kwaltang pilak. Misasabi la pang lihim at kaybat mikawani lang balamu ganap a tula king karelang pisabi.
