Linapit la king aliwang tapuk. Karin do tataryan ding manuk. Mamili lang tari. Ing manari isadya ne ing imalan a sedang malutu at iti kaskasa'neng kandila at karin italad neng mapilan ulit ing tari ba’yang kinang at talusad.
I’Tarsilo lalwa'ne ing manuk tahimik at alang imik. Balamu e ne man akakit at ing atyu king isip na aliwang bage king paintungul. Inapis ne ing gamat king kayang kanwan at —
“Makasadya na ka?” nganang kinutang king kapatad na king siwalang payo.
“Ako? Nandin pa. E ku no kaylangan akit!"
“Ya itang . . . ing kalulung kapatad tang babai...”
"Abah! E na sinabi kekang ing pamuntuk ya i’Don Crisostomo? E me ikit migmain kambe ning Kapitan Heneral? Nanu ing kekatang panganib?”
“O nung mate kata?”
“O ninanu? Ing kekatang igpa mete yang pemarug da.” “Tutu ita!
Ding mikapatad penintun de i’Lucas busal da letang dakal. Inyang atiglapan de, mipatuknang ya i'Tarsilo.
“Ali! Mako kata keti, mipahama’kata!” nganang minyabi.
“Mako na ka nung ita yang buri mu, aku tanggap na ku!”
“Bruno!”
King kealan kalma ing metung a lalaki linapit ya karela at ngana:
"Musta kayo? Aku keta kung bulik."
Ding mikapatad é la bubulad.
“Munye kung palugit!”
“Magkanu?” nganang kinutang Bruno
Ing lalaki binilang no ring kwalta nang tyapat a pesus. Lalwa’neng e mangisnawang Bruno.
"Atin kung adwang dalan. Limang pulu laban apat a pulu!”
"Ali!” nganang matimid Bruno. Sulung pa .
"Mayap ! Limang pulu laban atlung pulu!”
"Idobli yu nung buri yu!”
“Dale. Ing bulik king patrun ke at ibat ku pamung
