“'Me ka keni, babae!” ngana ning doktor, "é me pa...pansingan!”
“Paburen mung turwanan ke iting mababang alang marine!” nganang mekibat ning babaing sinikil king asawa nang bigsu na mu misubsub, at mibalik ya kang Donya Consolacion.
"Kilalanan yu nung ninu ing kasabi yu!” nganang minyabi, "é yu isipan ing metung kung probinsyana ó babai ring sundalus! King bale ku Menila e la lulub ding alperes, manaya la king pasbul.” “Hola, kakamalkamalan a Senyora Puput! E la lulub ding alperes, dapot wa, ding pile anti mo ita, ha! ha! ha !”
Nung é uli ring kolorete, i’Donya Victorina meyakit ya sanang menimutla. Buri neng lukswan ing kayang kasalang dapot pinigil ne ning bante. Kabang malilyari iti ing dalan kinatmu ya karing manalbe.
"Mibababa king makipagsalita kekayu, akung taung ating matas a kabilyan . . . Buri yung pipyan ing kakung imalan? Bayaranan da kong mayap ! Ukulan yung é ku balu king ikayu labandera kayo?”
I’Donya Consolacion mibalikwas yang mikakamas. Itang dikil king pamaglabada penasakit ne.
"Ukulan yu king e mi balu nung ninu ikayo at nung nanu lang tau ring keyalam yo? Dale, sinabi na ngan kaku ning kakung asawa! Senyora, aku agyang makanyan mu, e ku meging kaninu man nune mu king metung mung tau, dapot ikayu? Kaylangan ing mamate neng danup ing metung a tau ban pagdamuta'ne ing maging basan ning bala namu!”
Iting pakibat tira’neng mayap i’Donya Victorina. Miglislis ya, sikmal no ring gamat at mingingitngit a ipan, nganang migmulang minyabi:
"Tipa kayu, matwang babi, balbalan ke ing asbuk mung marinat! Babai ring metung a batalyun a sundalus, makikyupa na ka ibat pa man king kapilan!”
Ing Medusa bigla yang mewala king awang, meyakit pupulaing tinipa, yasiwas ne ing latiku ning kayang asawa.
I'Don Tiburcio memilatan yang manigapu, dapot malyari la rin sanang mikaras ding adwa nung é ya dinatang ing alperes.
