I'EIias, binang mipamulala, inatna ne ing buntuk na at makamulala neng linawe i’lbarra.
"Ikayu man, ginu, maniwala ko king "marok a kaylangan?" nganang kinutang king siwalang halus gagalgal. "Panwalan yu king ban makagawang mayap kaylangan ing gawang marawak?”
"Ali; manwala ku kaniti anti mong panulung masikan a dapat gamitan potang buri ta yang ulwan ing metung a sakit. Ngeni ing balen metung ya waring dake maki sakit a guguno, at ban ulwan ya, ing kapamahalan mapilit yang gumamit paralan a mabagsik at masangil nung iti ya ing buri yung pamalagyu — dapot kaylangan at maulaga.”
"Marok yang talapanulu, ginu, itang manintun mu at manula karing waga ning sakit, at e na pagpilitan ulwan ing panibata’ning marok, ó balu na iti dapot tatakut yang arapa’na. Ing gwardya sibil ya mu ing darapta'na iti, ing pangayantala ning kapaslangan king kapamilata'ning sikanan ampon ning patakut, kapagnasan a é magaganap at matutupad mine mu karing pamikatagun. At pakibalak king ing sosyedad malyari ya mung maging masangil karing sikakatau potang iti aibye no kareta ring paralan king karelang pangakayap. King kekatang balen, anti na ning alang sosyedad, pauli ning ala lang pamisanmetung ing balen ampon ing kapamahalan, iting tawii dapat yang mapanupaya,é mu uli ning ya kabud kaylanga'na ing kapanupayan, nune uli ning ing taung balen, e melingap at pepaingguluta’ne ning kapamahalan, ditak ya pakibatan pauli ning tinanggap yang ditak mu king sala. Subali pa king — isundu ing kekatang pamilimpi — ing panulung mibibili karing sakit ning balen binang makasira at mararandam mu king katawan a alang sakit a nung kaysanu ing panulu makaina at misasadya kaniti king aliwa pang kapanandaman. E kaya lalung mayap ing pasiknangan ya ing katawan a masakit at bawasnan ditak ing sikana'ning panulo?”
"Paynan ya ing gwardya sibil e kasi ipanganib ing kapanatagan ding sibabalen?”
"Ing kapanatagan ding sibabalen!” nganang gingkas magdalang kapaytan Elias. "Saguli na mung maging labing limang banwang deting sibabalen atin lang gwardya sibil, at alben yu, atin ta pang tulisan, darandaman ta pang panyalakayan do ring sibabalen. Angga
