"Laban karing katatagan relihyosa?"
"Ginu, laban karing manalipit karela.”
"Malyaring kelingwa'na na ning Pilipinas ing utang na kareting katatagan? Malyaring kelingwa’na na ing maragul a bage dapat nang pasalamatan karing kinanwa kareti king kamalyan ba'rong dinan kasalpantayanan, karing minampun karela laban karing kapagmasikampwan ning kayupayan sibil? Oiti ing dewaka'ning é na pangaturu karing tau ning istorya ning balen!”
I'Elfas, mipamulala, e na maybug paniwalan ing daramdama'na.
"Ginu,” nganang mekibat king siwalang malangi, "bibintanganan yeng alang pasalamat ing balen. Paintulut yung aku, metung karing memalen a manandaman, ing pagmasakit ke. Ding dapat a mayap a daraptan ding tau, ban mangaintuliran lang mipasalamatan, kaylangan ing malinis la't alang kayabe lihim a pamagimbut. Kalingwan tamu ing misyun, ing pamaglunus kristyanung binang maralas masasambitla. Ilele tamu ing mengapalyari king milabas, e tamu pangutang nung nanu ing depata’ning Espanya king balen hudiyo a minye king meto Europa king metung a ulat, metung a relinyon at metung a Dyos; nanu ing depata'na king balen arabe a minye kaya king pamanyangi king mayap a kanwanan, pepaintulut king kayang relihyon at ginising king kayang pangamakabalen, matudtud, sira halus king kekaba’ning pamanyakup ding romanu at godu. Sasabyan yu king binye ra kekatamu ing panyalpantaya at binawi ra katamu king kamalyan; awsan yung kasalpantayanan itang salimpapo pamidapatdapat, awsan yung relihyon itang pamangalakal karing kwintas at kalmen, katutwan detang milagro at kwentung daramdaman tamu aldo-aldo? Iti wari ya ing patuntu’nang Hesukristo? Kaniti é na kaylangan ning metung a Dyos ing paypaku king krus, at itamu ing kilala king alang anggang kapasalamatan. Ing kapaniwalaking é tutu malambat nang manatili, bina mung kaylangan ing marapat misnang kayapan, at ding kalakal itas la alaga. Sabyan yu kanaku ing dakal man a kamalyan ing relihyon ta ngeni, mayap ne kesa kanitang relihyun tang minuna; ita panwalan ku at nanayunan, dapot misna yang kakamal, pablasang king uli na wiksi tamu ing kekatang pangamakabalen, ing kekatang pamagsarili. King uli na binye ta la karing kayang pari
