I’lbarra tinalakad ya king kayang luklukan.
"Oh, é ko paibalisa! Ing pamagpakarok é na kamarinayan kaya at e na kealan dangalan king asawa: Ing dangalan ampon ing kamarinayan ala na. Ing asawa meulu la ring kayang sugat at iti kambe ning asawa na ampon anak sinalikut la karing bunduk niting lalawigan. Keting salikutan penganak ne ning babai ing anak a misnang pamikelangan a aske at dakal a masakit a mayap na mu mikalmang mete ban e malambat magkasakit. Keti migkabyayan la pang mapilan bulan, misnang kakalulwan, makalaut, pikakasaman at panginlagan ding sabla. Ing ingkung ku mayna pa lub kesa king kayang asawa at ala nang agyung magdala pa king kayang kasakitan, migpatiwakal ya, sirang lubus a lub manakit king asawa nang masakit, alang nanu mang kasaup at lumingap. Ing bangke mebuluk ya king lalawa’ning anak a halus ala mang arapat ban lumingap king indu nang masakit, at ing buluk a manibatan king karinan pepabalu no reti karing king kapamahalan. Ing kakung impu midalum ya king kasalanan a é pamipabalu king mete; singkan da kaya ing pamakamate king asawa at ita mepanwala, pablasang nanu ping e na arapat ning babaing asawa ning metunga sawi a kaybat na nita meging babai neng marok? Nung sumpa ya, palagiwan deng malaram, nung manangis ya sabyan dang magkakanwari ya mu, at maygit ya pa king malaram nung saksya'ne ing Dyos. Makanyan man mika ditak lang pamipakundangan at penaya ra ing mibawi ya at kaybat tinali re: balu yu king ding prayle papaniwala ra king ding indyo malyari la mung salese king kapamalitan ding barug.. Basan yu ing sasabya'ning Padre Gaspar de San Agustin:
"Myatulan yang makanyan ing metung a babai, isumpa ne ing aldo a nung kapilan ya mibait ing kayang anak, uling ita, subali king ikaba na ing kasakitan, sintanga'no ring panandam nang mayubu ning indu. King kakulangan kalma ing babai menganak yang matula, at king makanyan mu namang kakulangan palad ing anak mibait yang mataba. Kalabas ning adwang bulan metupad ya ing atul at ding tau matula la, uling kanita ukulan dang mekatupad la king karelang tungkul.
“Pauli ning ala neng katahimikan karing bunduk, ing babai, kambe ring adwa nang anak, linakad lang papunta king makalapit a lalawigan at karin migkabya
