I'Maria Clara, makalukluk king pyanu pilatan ding adwa nang kakaluguran, ume yang mipatikdo, dapot mekulang a sikanan myuman yang linukluk. I’Linares menimutla ya at linawe ne i’Kapitan Tiago, iti naman beba no ring kayang panlalawe.
"Itang kayanakan akakit keng maging mayap,” nganang migsundu ning kura, "inyang bayubayu e ku masanting a pamalak kaya . . . maki kabugasukan yang bagya, dapot kaybat tutu nong balung larinan ding kayang kakulangan, e me apaginakitan. Nung e mu sa ing Padre Damaso . . .
At ing kura linawe neng malagwa i’Maria Clara a ketang penandit makirandam bista’t e no kinawang ding kayang paglalawe king papil ning tigtiga’na king pyano agyamang panganduta'neng pasalikut Sinang a makanyan patuyag king kayang tula. Nung iti magdilidili ya, mekad tinerak ya.
"Ing Padre Damaso? . . .?nganang kinutang Linares. "Wa, ing Padre Damaso sinabi na,” nganang milud ning kura, e no kinawang ding mata na kang Maria Clara, "a anti mong . . . tegawan king binyag, é na apaintulut . . . dapot king katatawlyan, isipan ku nung ing Ginung Ibarra manyawad yang kapatawaran, bage e ku pikakunwan, ing sabla salese.”
I'Maria Clara tinikdo ya, minyankan, at linub ya king kayang sidwan, tikya'neng Victoria.
"At nung ing Padre Damaso é ne patawaran?” nganang maynang kinutang Kapitan Tiago.
"Kanita . . . i’Maria Clara ya na ing bala . . . ing Padre Damaso ya ing igpa na king binyag. Dapot ukulan ku ing makapipagkasalese la.”
Kanitang penandit, merandam la ring lalapit a inge ding takbang at linto ya i’lbarra, tutukya’neng Darang Isabel. Ing panyatang nang Ibarra pepasaring myayaliwang panandam karing disan. Pigaya'neng masaya i’Kapitan Tiago, at iti e na balu nung tumiman ya o manangis. Kang Linares memuge yang ganap. Ing Padre Salvi tinikdo ya at mayalala neng inabut ing kayang gamat. I’lbarra e na apigil ing panlalawe nang magdalang pamagmulala kaniti.
"E yu pagmulalan,” nganang minyabing Padre Salvi, "ngeni pamu pupuryan da kayu.”
