At atin ya ping sangkan migaganaka. Ma-adwang pulu katakbangan bandang gulut, daratang ya ing aliwang anino, maragul, at maygit ya pang lalung lupang anino kesa king minima. Misna yang kalumame panakbang king gabun. Lalbug yang malagwa anti mong yakmul ne ning gabun balang ing mumunang anino tuknang ya at malikid.
“Ating tutuki kaku,” nganang bubulung niting mumuna. Ya kaya ing gwardya sibil? Maglaram ya kaya ing sakristan mayol?”
"Sasabyan da king keti ing pamitagun," nganang mimisip ning kadwang anino, "ating marok kaniti ngening lilihim da kaku ring adwang mikapatad."
Ing mumunang anino miras ya mu rin king pasbul ning kutkutan. Ding atlung mumuna linage la.
"Ikayu ngan?”
"Ikayo?”
"Mikakawani tamu uling ating tinuki kanaku 1 Bukas abak mika sandata kayu at ing daptan tamu marapat itang bengi. Ing agyatan ya ini: 'Luid ya i’Don Crisdstomo!’ Sulung na! ”
Ding atlung anino mamagkambi 'la gulut da ring aun. Ing bayung datang migsalikut ya king kulkul na ning pasbul at tahimik yang manenaya.
"Lon tamu nung ninu ing tinuki kaku!” nganang bubulung.
Ing kadwang anino dinatang yang mitmung pamingat at tinuknang ya ban ya naman ing maglalawe.
"Tawli na ku panyatang!” nganang minyabing mayna; "dapot mekad magbalik la.”
At anti na ning magmula nang mababaldug ing mangalating patak ning uran at anting mangakung lambat, inisip na ing salilung lalam na ning pasbul.
Kaniti mitabnu la ila ning metung a atyu karin.
"Ah, ninu ikayu?” nganang kinutang ning bayung datang king siwalang maragul lalaki:
"At, ninu ikayu?" nganang tahimik mekibat ning metung.
Migtahimik sinaguli; ding adwa mipangilala la king kalingking ning siwala at panaske ding lupa.
