Menik ya king silid na i’Ibarra, a makarap king ilug, linukluk ya king metung a tabureting maragul at linawe na ing kelaparan king awang nang makabuklat.
Ing tulid nang bale king kasumangid pampang, mikakalabkab ya king sala at miraras king silid na ing masiglang tigtiga’ning musika a manibat karing instrumentung ding keraklan de kwerdas la. Nung e ya mu mimisip malalam at nung megumasid ya sana alang aburi nang akit, king kasawpan ding lenting panalbe opera, itang kasayahan a mararapat libutad na nitang masalang bale. Ikit na sana ing metung makawiling pyalben a makilupa karing mangaragul nang pilalagen ning Europa. King malale at malambis nang tigtig ning orkesta, busal ning mikakalukung sala, pilata'ning danum waring titipa karing bunduk a magdalang dyamante at gintu at geyakan king panagawla ning aslagan, linto yang makabalut king malino imalan, ing metung a dyosa, ing metung a mutya a lalapit halus e man makatuklu king lapag, makapalimbo kikislap. King arap na memukadkad la ring bulaklak, sinikan ing musika, at dirutan de ring dakal a demonyus, nimpas, inanu, sagala, angel, pastul. Dudurutan deng teterak at pakalaksingan do ring dala rang pandereia kabang ing balang metung kareti mibibili yang ampang karing bitis ning dyosa. Nung pegumasda'nang Ibarra iti ikit ne sana ing misna king kalagung dalaga, masanting a pamikakatawan, makagani king mairing dang imalan ding dalaga ning Pilipinas, libutad da ring makapadurut a taung myayaliwa lahi a mipapagsalitang masigla. Ating intsik, kastila, komanggi, sundalus, kura, matwa, kayanakan at aliwa pa. I'Padre
