- Ing sablang makasinup, milage,
- Alang mipasubalyan.
Ing kumpana pabalu na ing pangadi king gatpanapun. Inyang dandaman ding tau itang banal a tigtig mamamanuknang la, likwan da ing daraptan da at memaglako lang kupya. Ing talapagobrang menibatan king marangle, yantala na ing gale, ituknang na ing makasukad nang panakbang ning damulag a sasakya na, at saka ya mangadi. Ding babai mangurus la libutad ning dalan at magkakanwari rong pakimutan ding labi ban alang misip king é la mapangadi. Ing lalaki tuknanga'neng apisan ing kayang manuk at mangadi yang sisilim ban ing kalmang mayap mantabe kaya. Karing pibalebale mangadi lang masikan ding tau . . . ing sablang inge e makarikil king pangadi mituknang, mapipi.
Makanyan man, ing kura, makakupya, lipata’neng mirarapal ing dalan at iti pepagtingangasa'no ring dakal a matwang babai. At lalu pang makahale! minta ya king bale ning alperes. Ding talasimba isipan da ing oras nang ituknang ing pangimut ding karelang labi ban uman de gamat ing kura, dapot ing Padre Salvi e no pinsingan. Ngeni ala yang tulang pauma ne ing mabutul nang gamat king arung kristyanu, ban ibat karin ibaba neng pasalikut (anti mo ing apansing nang Donya Consolacion) king salu na ning metung a myalalang dalagita a dinuku ban yadwa'na ing kayang bendisyon. Mekad binang maulagang bage ing makaligalig kaya ban mangalingwan king sarili nang masabal ampon karing king pisamban!
King tutu, mirarapal yang menik king eran at minaus mamalagwa king pasbul bale ning alperes a linage
