"E ku ikwang abalu nung ninu ing makipasari. Nandin pamu akasabi ke ing metung karing alang isip a bayaranan dang dapat kanita at e ke apigil.”
"At ita, e na asabi kekayu nung ninu ing mamayad kaya?"
"Inawad nang isinup ku ing lihim, sinabi na king ikayu.”
"Dyos ko!” nganang mipasyo Ibarra at mitakutan ya.
"Ginu, e na ko mikakunu; e ta mu manyayang panaun, ing sinabi kung pamagtangkang pamanyalake malyaring marapat ngeni kabud bengi!"
I'lbarra, pakasilad a mata, at ding gamat na king buntuk, anti ne mong e darandaman i'Elias.
“Iting biglang katatagan e na malyaring myantala,” nganang misundung Elias. "Tawli na ing kakung panyatang, é ko balu ring mamuntukan . . . Iligtas yu ing sarili yu, ginu; sinupan yu ing kekong sarili para king kekong balen!”
"Nu ku muntang tumakas? Ngeni kabud bengi ating manaya kanaku!" nganang minyabing Ibarra at isipa'ne i'Maria Clara.
"Nu man karing balen, Menila, king bale ning metung a maki upaya, dapat mu sang king aliwang kakarinan, ban e mu masabing ikayu ing makipasari keting pangimut!”
"O nung aku kabud pabalu ku karing makyupaya iting katatagan?”
“Ikayu ing pabalu!” nganang minyabing Elias, lalwa'ne i’lbarra at saka ya minurung. "Lwal kong taksil at mataloti king mata ring bulag a talatuki, at anti mong mangatilihan karing mata ring aliwa. Sabyan da ing lelangan yu la ba'kong mirangal, sabyan da . . .”
"Dapot, nanu ing daptan?”
"Sinabi ku na kekayu: siran yu ing sablang papel a atyu kekayu a makaparikil king kekong pangatau, tumakas at panayan yu ing mapalyari . . .”
"At, i'Maria Clara?” nganang minyabing Ibarra, “Ali, mate na ku pamu!”
I’Elias papalipit no ring kayang gamat at nganang minyabi:
