"Daratang ne!” nganang Sinang at kindut ne i’Maria Clara. “Darandaman mo?”
Ing kumpana ning pisamban tinigtig yang kawalu at ding sabla pesitalakad la ban mangadi. Ing Padre Salvi king siwalang mayna at gagalgal minampang yang manungge, dapot anti na ning balang metung mitmu ya king sarili nang pamisip, e ra ne makaing pinsingan.
Halus mayayari pamu ing pamangadi, dinatang ya i'lbarra. Ing baintau makapaldas ya e mu king piblas nune angga king lupa, inya kabud ikit neng Maria Clara iti tinalakad ya at sinagana kaya ba’nang ikutang nung ninanu ya, dapot keta mu ring penandit meramdam ing akbung ding baril. I’lbarra mipatuknang ya, miglalawe la makapatulug ding kayang mata at e mekapanyabi. Ing kura migpampan ya king metung a asyas. Memakbung myuman, pasibayung akbung a merandam lele ning kumbintu a tikyan ding gulisak at pulai. I'Kapitan Tiago, i’Darang Isabel ampon i'Linares linub lang papulai, gugulisak : tulisan! tulisan ! I'Andeng tikya’na lang yasiwas ne ing akbak a bakal at pupulai papunta kang Maria Clara a kayang kinakapatad.
I’Darang Isabel siniklaud ya, kikyak at pangadya'ne ing kyrie eleyson. I'Kapitan Tiago, maputla at gagalgal, magdala yang tenedor at ate manuk a manangis nang yampang king Birhen ning Antipolo. I’Linares mitmu yang kanan king asbuk at ing sandata na metung yang kutsara. I’Sinang at i’Maria Clara mikakau'Ia. Ing bukud mung e kikimut, anti mong metilihan, ya i'Crisostomo at ing putla na e apamalarawan.
Ding gulisak at ding kalantug susulung la, ding awang bigla lang mangakabat, mararandam la ring pasyuk ding makyupaya at ing akbung mamisan-misan.
“Christe eleyson! Santiago, matupad ing ula .... Ikabat mo ring awang . . .” nganang sisiguk Darang Isabel.
"Limang pulung bombang mangaragul ampon adwang misa de grasya!” nganang mekibat Kapitan Tiago, “ora pro nobisI"
Tunggal ditak mibabalik ing makatakut a katahimikan . . . Merandam ing siwala ning alperes a pupulaing gugulisak:
"Padre kura! Padre Salvi! ’Meko keni!”
“Miserere! Ing alperes manyawad yang kumpisal!” nganang minyabing masikan Darang Isabel.
