ning angin angga kaya miraras masala ing katni ning
akbung. Tinuknang ya, mibalakbalak, at apansing nang
atyu king danum. Ing dagat tahimik at akakit na la
mu ring sulu karing bale ning talapagligo.
Migbalik ya king pampang at migbanda king balen. King nanung sangkan? Ya man e na balu.
Ing balen ala ya waring tau. Ding bale pakakabat la ngan. Ding kabud animal, ding asung parating kakaung ning bengi, pesisalikut la at tatakut. Ing pilaka’nang sala ning bulan lain nang digdagan itang lungkut at pamagdilidili.
Tatakut makatabnu karing gwardya sibil, mamaglub ya karing mulahan at hardin, at karing metung kareti balamu atin yang amatan a adwa katau. Dapot sinulung na ing kayang paglakad, at maglundag karing bakud at pilapil, miras ya king mitmung pamagkakasakit king kangatba nang sepu ning kabalenan, papunta king bale nang Crisostomo. King pasbul atilu ring utusan, misasabi at manandaman king pangasukul ning karelang panginwan.
Inyang abalu na ing milyari, i'Elias dinayu ya, minta ya kaguluta'ning bale, liksua'ne ing bakud, minukyat ya king awang at linub king gabinete a nung nu makasindi ya pa ing kandilang likwa'nang Ibarra.
Ikit nong Elias ding papil at libru. Atupa’no ring sandata ampon ding suput a kalulanan ding kwalta at iyas. Pigunam na ing milyari karin, at manakit binang dakal a papil a malyaring makapanganyaya, inisip nang kwana'na la, yugse king awang at saka no ikutkut.
Linawe ya king hardin, at king sala ning bulan ikit no ring adwang gwardya sibil a daratang ating kayabe. Ding bayoneta ra at kapasete kikislap la king sala.
Kanita inari na na nung nanu ing kayang daptan : tinipu’na ing imalan at papil libutad ning sidwan, tigtug na kaniti ing lama’ning sulung petroleo at saka na pepatawan Bebat nong malagwa ring sandata king kayang awakan, ikit ne ing larawa’nang Maria Clara, mikakunu ya . . . lila’ne iti king metung karing saku at mamitbit linuksu ya king awang
Oras na; ding gwardya sibil pipilitan da neng bubuklat ing pasbul.
