King kaburya'ning Dyos meabak mu rin king balen
a gagalgal king takut.
Ding dalan king kwartel at king tribunal ala la pang tau at malungkut la. Karing bale balamu ala mu namang tau. King makanyan a katahimikan, bigla yang mibuklat ing kapirasu ning awang a dutung at tinando ya ing buntuk ning metung a anak a miglalawe misusumangid. Alang kananunanu memaltuk masikan pauli ning pamitabnu ra ring balat a mekulti at ing balat ning tau. Mipanganga ya ing anak, migpyak ya at kaybat. bigla yang minurung, limbug ya at mikabat ya ing awang.
Migmula na ing alimbawa. Ing biglang buklat at sara ring awang myulit-ulit na, uling king metung a awang a makakalale mibusni sinungo ya ing metung a matwang mengalumpis na lupa at alang ipan. Ya i'Hermana Pute, ing matalik mangulu kabang manaral ya i'Padre Damaso. Ding matwa at ding anak ilang pekakatawa’na ning pamagosyosu keti sulip. Ding mumuna, king uli ning imbut dang abalu ing sabla at ding kadwa, ba’rang atandanan ing abalu ra.
Alang kapikakunwan metung man alang minawal kaya uling makatando ya mu, daranum ya wawa, lulura yang mangasikan at kaybat mangurus ya. Ing awang king tulid mibusni ya namang pakakalale at ya naman ing sinungo ing Hermana Rufa, ing matwang bisang mamirait at e na man bisang mapirait. Milawayan la sinaguli, mitimanan la, misinyalan la at kaybat mengurus la.
"Hesus! balamu misang pasalamat, anti mong fuegos artificiales,” nganang Hermana Rufa.
