"Ipangadi ta ya ing kaladwa na?" ngana ning metung a dalaga kaybat neng linawe mayap.
"Mamulang ka? Herehi ya yan !” nganang minungil Hermana Pute. "E mu balu ing sinabi nang Padre Damaso? Buysita’nya mu ing Dyos nung ipangadi me ing metung a perusa’na. Ing magpakamate miparusan yang alang pangakabla. Uli nyan e malyaring mikutkut man king banal a lugal.”
At nganang tinuglung:
“Inukul ku nang yang taung yan e mayap ing kararasa’na. Kapilan man e ku abalu nung makananu yang mabibye.”
"Aku ikit keng mekisabing mekatadwang ukdu king mayul,” ngana ning metung a dalaga.
"E para magkumpisal o manyawad misa, agyang makananu.”
Dinatang la ring siping-siping bale at ding dakal a mirun a migpatulug king makabitin a magyuyu pa. Kaybat ning kapitnang oras dinatang ya ing metung a konstabularyu, ing direktorsilyo at adwang pulis. Deti kildas de at binili re king metung a kalapayan. “O ba't mamirapa’lang paymate ring tau?” nganing direktorsilyo kabang kakwana'ne ing pluma nang makasipit king balugbug na.
Pigmula’na ing manyakap nang kutang, kinwana neng kapasyagan ing utusan a panaranta’na. Ngana neng Ion marok a mata, ngana neng balan, ngana nang sabyan king sinabi na ing metung a bage é na man sinabi ning utusan, at uli na nyan, inukul na ing masukul ya, kinyak nya mu at melaus sinabi nang é ya manintun gule nune ... at gewa ne pang saksi i'Teu.
Kabang iti malilyari, ing metung a taung makaturung a malapad at maki malating balutan a makatali king batal, lalwa’neng mayap ing mete at ing lubid. Ing lupa é ya binang marimlang anti mo ing mabilug nang katawan. Babo ning tali atin yang adwang galús at adwang malating tuldik a malutu. Ing gasgas ding lubid maputi at alang daya. Ing osyosung taung bukid a makaturung a malapad sinyasat nang mayap ing kamisa na’t pantalun at ikit nang mitmu lang alikabuk at bayu ing gisi king aliwang dake. Dapot ing pigmulalan dili ya pin ing bini ring sulput a tinaid king kwelyu ning kamisa.
