"Nanung lalon mu?” ngana ning direktorsilyo.
"Lalon kya mu pota kakilala ke,” nganang mekibat mayna at saka ne diku ing turung na bilang mamuge.
"E mu wari dimdam king yan ya i'Lucas? Matudtud ka?” Meyli la ngan. Ing magbubukid, mipakarine ya, milung yang mapilan a amanu at saka ne ginulut makakalale, makaduku.
"Hoy! nu ka ume?” nganang ginulisak ning direktorsilyo. "Ken e ka milwal. Yang dalan a yan payke ya king bale na ning mete!”
"Matudtud ya ing tau!” nganing direktorsilyo bilang biru. “Maya’pa tugtugan ta yang danum.”
Meyli lang pepasibayu ring atyu karin.
Likwa'no ning taung bukid ding taung manalbe uling linto yapg makarine at minta ya king pisamban. King sakristya kitang ne ing mayul.
"Matudtud ya pa!” ngarang magaspang mekibat kaya ring kitna'na. "E mu balung liban de nabengi ing kumbinto?”
"Panayan keng migising.”
Linawe reng marok a mata ring munisilyus a makasane nang lalon dang marok a mata ring panginwan da.
King metung a suluk, busal ning dulum, karin ya matudtud ing mayul, a bulag a metung a mata, king metung a maragul a luklukan. Ding salami'nang mata makatumpak la king kanwa’na at makasabit la ring tangke na king makaba nang bwak. Ing salu nang payat makalto ya at akakit meng mumukyat at kukuldas king pangisnawa na.
Ing magbubukid linukluk ya siping na, alang bulad, at kanwari kebalaganan yang pera inya dinuku ya at king sinag ning metung a kandila penintu'ne lalam ning luklukan a nung nu ya matudtud ing mayul. Ing magbubukid ikit na king atin ya na mang sulput ing pantalu'na at manggas kamisa ning matudtud a bandang tawli mipagising. Kaybat neng kisutan ing metung na na mung matang manakit, inarapa'neng mwa ing atyu king arapa'na.
"Bisa ku sana pung manyawad misa, ginu,” ngana mong miglwalan ning taung bukid.
