Idala ya king talaga!" ngana.
Ding pilipinu balu ra nung nanung buri nang sabyan niti.. Ing buri nang sabyan king tagalug timbain (itimba ye). E mi balu nung ninu ing mekaisip king parusang iti dapot ukulan ming matwa nang dapat iti. “Ing katutwan lulwal ibat king talaga” balamu wari metung a kasebyan a é tuntun a pangagamit.
Libutad ning patyu ning tribunal karin ya ing metung a talagang pepadurutan ding batung mabye katulad da reng talagang pikabalwan malda. Kakutud yang kwayan a megawang panyaklu ketang marinat at mabuluk nang danum ning talaga. Kapsang maburak basura at pitak karin ngan mananabu kalupa ning kwartil. Itang talaga yang pyugsanan dang dinat ding atyu karin. Kabud mebaldug ya karin ing nanu man, lek neng mistula. Makanvan man e na akakwang mamala. Nung misan ding dakap (preso) kukulkulan de at lalalam, e uli ning bilang pamamarusa nune ba'ra mong takman ing mabayat a obra. Ing ninu mang dakap a pepakuldasan da king talaga lagnat yang alang kapilisyan at makabilang na karing mete.
I'Tarsilo pagumasda’na nang mayap ing sasadya ra ding sundalus. Maputla yang bina at ding labi na gagalga'la uling atin yang bubulung o kaya mangadi ya. Itang tibe na king bili nang ala nang nanenayan balamu wari mimina o mebating nang lubus. Madalas yang duruku at maglalawe lalam at makasadyang paypagkasakit. Dela re lele ning talaga at tikya’neng makatiman Donya Consolacidn. Linawe nong mipnung dirya retang bangke makabuntun uling karela mepupus na ing kasakitan!
“Manyabi na ka!” nganing direktorsilyo, "uling bitayan da ka rin. Mate ka man é na ka mu dakal a kasakitan a tinggap.”
"Keti, milwal ka potang mete na ka! nganing metung a kwadrilyero.
Leko re ing sumpal nang asbuk at binitin deng makatwag. Ipalbug deng mumuna buntuk, anti mo ing timba dapot ing tau kaylangan ing malwat yang bagya pangalbug king talaga.
Menintun yang orasan (reloj) ing alperes ba'nang abilang ing penandit potang ipalbug de.
