“Bitayan da ka sa, talasalungat! ” nganang ginulisak kaya ning metung nang kamaganak Albino, at e ya mekapangawat, dinaklut yang batu at saka ne besibas.
Ing ikit ding malda agad dang pekyapusan. Minuran basibas batu at alikabuk king bayntau.
I'lbarra mibata yang e bubulad, alang mwa, alang tutul. Ita ya ing pamamun, ing tawling amanu ning mamako king balya’na nung nu melakwan ing anggang lugud na at tagimpan. Diku ne ing buntuk na. Marahil ukula’ne ing metung a lalaking pamarugan da kabang lalakad de karing dala’ning Menila, o ing metung a matwang babaing mete bigla kabud atiglapa’ne ing buntuk ning anak na. Marahil ing bye nang Elias yang lalabas karing panimanma’na.
Buri no sang ipinpin ning alperes ding tau dapot ing basibas at ing palmura alang patugut. Metung ya mung Indu ing magnasang mamali king panamdama’ na; i’Kapitana Maria. E bubulad, kekata'no ring labi na, ing Iwa na sasagese karing mata na. Lalwa'nong darayu ra ding adwa nang anak. Daig ne pang lubus ing balitang Niobe king pamibabata na nung tangalan mu itang keala'nang imik mamakmul king pait ning sakit a daramdama’nang Kapitana Maria karing adwa nang anak.
Linakad da no ring makasukul.
Karing taung makasilip karing awang a bagya mu pangabuklat ding malulunus kang Ibarra deta mung alang masabal at manalbe mu. Sinalikut la ring anggang kakalugura’na, angga na ing kabud Kapitan Basilio. I’Sinang, ing anak na, binawal ne pang manangis king kalma nang Ibarra.
Belika'nang Ibarra ing babasuk nang makatagan ning silaban dang bale na, ing santungan ding pengari na, itang sale ning mayubu nang bye maintang at kayanakan. Ing Iwang kukumpita'na king malwat a panaun, memalisbis karing mata na, diku ne ing buntuk na at é ya mika sikanan mang isalikut na ing Iwang tutulu uling makagapus ya, at keta mang panamdama'na metung man ala yang akakit malulunus. Ngeni ala neng balen, tuknangan, sinta, kakaluguran at payntungulan!
Manibat king metung a matas a karinan, metung yang lalaki ing magumasid karing makalunus a lalabas
