Ding telegramang lihim a mipalimpad Menila belita ra ing milyari at kaybat ning atlung pulu’t anam a oras ya na mu ing pisasabyan dang pasalikut ding malda at e ditak ing bala ding pahayagan a miragdagan, mangauman at penalila’ning talasuring balita. Samantala, ing balitang makapasubali menibat karing kumbintu ya ing mumunang miglipat-lipat lihim karing asbuk a pepasaring e mu naming takut karing mekabalu. Ing mepalyari, agpang king mibalita, myayaliwa na kerarasan at karing mekabalita ati'nang pupuri, ati’nang pipintas, agpang king panyuri na't panamdam ning sikakatau.
Bista man karing dalan balamu payapa ing sabla, karing sibabale mababalisa ing katahimikan katulad ning mealigogo danum ning tangki. Kabang king babo danum tahimik, lalam naman é la patugut kakawe, mamyalungan at mitatagalan ding piping asan. Ding aliwang memalen, akakit do ring mangatungkulan karing myayaliwang panig anti mo ring karing pisamban, kumbintu, tanggapa’ning kapamahalan, ding mangatas a taung mangatungkulan at mengatungkula’na, anti mong mariposang lilibad karing makapatulug a kwaltang gintu. Ding aliwang memalen naman manakit lang bigang matuling, tatakas lulwal ibat king madalumdum a lugal, anti mong anino malabug, rehas a bakal, talikala, ampon ding makapangilabut nang asyas ning bitayan. Daramdaman da waring lilibut ning angin ing myayaliwang kutang a tanggapan da ring merakap, ing atul, ing gulisak a ipasari na ning pamamarusa. Ing Marianas at ing Bagumbayan mayayaninag lang anti mong galut at madayang pandung. Ding asan at ding darakap asan milulupa lang balisa. Ing kapalaran lalarawa'na ing malilyari king pamigunam ding
