(Marok a lakad ing negosyo at e ku balu nung nanung
kaulya'na.)”
Menimutla yang e mu nanu i'Kapitan Tinong inyang damdama'no ring dakal a amanung mapupupus king um kaya iting amanu mangabaldugan yang marok. Ing asawa na naman, magparalampu nong pidaup ding palad na at ngana:
"Pisan, e mu na ke pakisabyan ngeni king latin uling e ke pilosopong anti ika. Pakisabyan mu keng tagalug o kastila dapot usukan mu kami.”
"Sayang na, pisan, ing e ko makayntinding laten, uling ing katutwan king latin kalaraman naman king tagalug. Anti mo alimbawa : Contra principia negantem fustibus est arguendum. King latin yan metung a katunayan a kalupa ning Daung nang Noe. Depatan ku yan misan king amanung tagalug at aku ing mepalupalu. Uli niti, sayang a tutu ing e ko byasang latin; king latin asalese mu ing sabla.”
"Ikami man dakal ke balung oremus, parcenobis at Agnus Dei Catolis, dapot ngeni e ke mikakayntindi. Ituru meng magmatulid mayap i'Tinung ba'reng e bitayan!”
"E masanting, pisan, e masanting a bina ing pamakikaluguran mu ketang taung ita,” ngana ning maglatin. "Ding mayap a tau ilang mamayad king dapat da ring mikakasala. Maibug da na kang pagawan testamentu mu keng depatan mung yan! Vae illis! Ubi est fumus ibi est ignis! Similis, simili gaudet; atqui Ibarra ahorcatur, ergo ahorcaberis . . . (Balang metung panintuna'ne ing kaparis na. Inya nung bitayan de i'lbarra, bitayan da ka naman!)”
At pipiling ne misusumangid ing buntuk na.
"Saturnino, ninanu ka?” nganang mipagulisak Kapitana Tinchang, mipnung takut. "Ay! Ginu kung Dyos! Mete ya! Maus kong doktor! Tinong, Tinongoy...!”
Linapit la ring adwa nang anak at ding atlu menagulele la.
"Mebungsul ya mu, pisan, mebungsul ya mu . . . Nung aku sana, buri ku pang ... buri ku pang ... o neng mebungsul ya mu . . . Non timeo mortem in catre sed super espaldonem Bagumbayanis! (E ku tatakut mate
