"Balu yu nung naming dimdam kung sasabyan da?” ngana naman ning metung pang atyu naman karin a minutut king pisasabyan. “Ing asawa na kanung Kapitan Tinong . . . atatandanan ya mo? King bale na karin ta pa tinerak at minapun ketang pista Tundu . .
"Itang maki adwang anak a babae . . .? O, ninanu ya?
“Ing asawa na digalwa'ne ing Kapitan Heneral metung a singsing a maki alagang libung pesus, ngening gatpanapun!”
Ing putut minarap yang bigla.
"Tutu man? At baket?” nganang kikislap a matang kinutang.
"Sabi ning babai, regalu yang pag-Pasku . . .”
"Pabulan pa bayu Pasku!”
"Gaganaka’nang magbanda ya karin ing bagyu,” ngana ning mataba.
"At mamatukud ya!” nganang tinuglung ning payat.
"Ing babye king é mayayawad a kamalinawan magtapat yang pamikasala!”
"Ya nang ukulan ku yan. Tigkil ye king taliri yu ing sugat.”
"Kaministilan syasatan mayap iti,” nganang sinabing mimisip ning putut. "Pigaganakan kung kanyan ating pusang makasalikut.”
"Yan, pusang makasalikut, yan mu naman ing buri kung sabyan,” nganang minulit ning payat.
"At aku naman,” nganang sinalabat ning aliwa, "sasabyan kung ing asawa nang Kapitan Tinong sidsad ya king kakuriputan ... angga man ngeni ala ya pang pepadalang regalu kekatamu bagkus minta ta na keta karela. Inya ustung ing metung a makasakmal ampon mapagimbut mignus yang regalung alagang libung pesus. .
"Dapot, tutu kaya yan ...? nganang kinutang ning putut.
"Ay! tutung tutu! Sinabi na yan king pisan ku ning bayntaung kakaburi na, ing talasaup ning Kapitan Heneral. At ukulan ku itang singsing a ita ya kabud ing susulud na ketang pista ning matwa karing anak nang
