pang pamanyubuk kaya ning banwa ban lalung makilala
ing lusuk nang kasalpantayanan at kabanalan.
Kaluguran de ring pari, gagalangan de ring sakristan,
pamatulan de ring mangalakal intsik at ding suki nang
gagawang fuegos artificiales, ing tau matula ne king
relihyu'na keti king yatu, at ding matas a tau at
pikabalwan maki lub king Dyos sasabyan dang banwa man
maragul ya panenayan.
Kapanusig ne ing Kapamahalan bista man iti masakit paniwalan. E ya malyaring mukul bayung pamalak at matula ne king salukuya’nang kabyayan. Makasadya yang mamintu kenu mang kapugit-pugitan a mangatungkulan numan karing tanggapan, makasadya yang munye patang-hamun, manuk a kapun, pabu, prutas a ibat China agyang nanung bulan king pabanwa. Nung damdaman nang palmuran do ring memalen, makisalamuha ya at labis ya pang malmura uling e na bibilang komanggi ing sarili na. Nung tatatsan do ring mistisu ya man makyabe yang manatsa, balamu wari ya mo tune neng kastila. Mumuna yang diling pupuri at papakpak king nanu mang bayung singilan karing memalen lalu na nung keng singilan a yan atin yang ababaut a pakinabangna’na bandang tawli. Atin yang makasadyang orkesta a panyalubung at munye parangal kenu mang gobernador, alkalde, fiscal, king kayaldawan da, kebaytan, o king kamataya'ning kamaganak da o nanu mang makayaliwa king sadyang mayayakit. Para kaniti, pasulat yang poesyang papuri, dalit a babye damla king maganaka at malugud a gobernador o king matapang a alang kanglap a alkalde a manayang tanggap banwa king galal da ring taung mayap (o parusa) at aliwa pang bage.
Megawa yang pamuntuk king aguman da ring makwaltang mestisu bista man deti tinutul la uling e re bibilang kadaya ra. Lub ning adwang banwang pamangatunkulan mekasira yang apulung frac, apulung kupyang matas at kapitnang dusenang tukud. Ing frac at ing kupyang matas magagamit la king Ayuntamiento, Malakanang at king kwartel militar. Ing kupyang matas at ing frac naman king sabungan, king palengki, king limbun at karing tindahan intsik. Lalam ning kupya at kilub ning frac mamawas yang maralikat karing yasiwas nang tukud kabang mumutus ya, ma-
