King katutwan, king misnang sala nang tindag ning
kildap menakit yang taung makapiblas maputi, makatalakad, halus king taluktuk ning atap, tatas no banwa
ring takde na at lupa, anti mong manigapu. Ing banwa
ilang pakibat na ring kildap at duldul!
Kaybat ning duldul merandam ing misnang lungkut a daing.
“Aliwa ing angin, ing pantasma!” nganang bubulung ning sundalus anti mong pakibat king pasla na king gamat na ning kayang kayabe.
Ding "ay! ay!” darala no ning angin babo ning inge ning uran. Ing angin e na atakpan king kayang panyup itang siwalang mayumu, makalunus at mitmung ligalig.
Kinislap ya ing metung pang duldul king salang makailo.
"Ali! e ya pantasma!” ngana ning mapya. Ikit ku ne ita inyang misan. Malagu yang anti mo ing birhen... Mako kata keti... Pabalu ta iti!”
Ing sundalus e na na pemayang meulit itang pamanagkat at ding adwa limbug la ketang dalumdum.
Ninu ing daralung busal nitang kabengyan, busal ning angin, ning uran at ning bagyu? Ninu ing malamarine birhen, ing esposa nang Hesukristo a minarap ketang pangahugnus ding makatakut a elemento at pinili ne itang makapangablad a bengi ampon kalwalasa'ning banwa ban idalung no ibat ketang mapanganib a ketasan ding tutul na king Dyos? Pepaingguluta’ne kaya ning Ginu ing templu na king kumbintu at e na no pakirandaman ding pangade? E ra na kaya payntulutan detang bubungan mitas angga king trono ning Lalung Mapaglunus ing dalung na ning kaladwa?
Ing bagyu mibugnus alang lunus kilub ning halus kebukas a nung kapilan alang metung mang batwin. Ding "ay!” a misnang kalalam a makisamut king byung na ning angin sinulung la, dapot ikit dong maklak ing ketawan ampon ding tau. Ing Dyos migtakap Ya at ala Yang darandaman . . .
Itang kabukasan, inyang melinis ne ing banwa karing matuling a lulam, ing aldo sinlag yang pepasibayu busal ning angin a melinis, ing metung a saken tinuknang ya arap nang pasbul ning kumbintu Santa Clara at kinuldas ya ing metung a lalaking pepakilalang pe-
