maregla, manayus at manuman king sabla king
mipnung sipagan a makapagmulala at tututwana'na ing
kayang tungkul.
Inya ring makiyupaya ikit da king mayap yang tau, maki gintung pilubluban, payapa, mapamintu, e tututul, mapamye lub, e ya babasa nanu mang aklat o pahayagan a manibat Espana bista man byasa yang kastila. Lalawan deng katulad ning paglalawe ning metung a magaral king mepupud nang takung ning luma nang sapatus a mekibit king paglakad na. Makabage kaya ng katutwa'na ning kasebyan Cristiano at pagano : “nwan la ring kalulu king espiritu at nwan la retang atinan” (beati pauperes spiritu y beati possidentes). At kaya makabage ya naman ing maling kasebyan a meangu king griego: “Ligaya king Dyos king katasan at kapayapan keti sulip karing taung maki mayap a pilubluban'’ uling anti mo ing akit tamu kaybat e managyung ing tau maki mayap yang pilubluban ba’yang mye payapa. Ding kosyang awsan deng luse, ding kalulu awsan deng alang lunus, bwangis mapagsamantala king kalukan, at ding mababa kaya awsan deng lasip at masikampu. At ding babai? O, reng babai! Dakal ing e masanting a bulung-bulung karing makalunus a bale pinaud. Kilub da reti mararamdam ing siguk at daing kayabe ning matarling dang kyak ding anak. Ating babaing tutuldwan da’t pisisitsitan ding siping nang bale, iti e na na pansing ing tatsa ra. Dapot yang bage bage yan e ne sisiran a tudtud. Alang dalagang makapangabala king katahimika’na dapot metung yang matwang babai ing kaligliga’na king kabanalan at yang babaing yan tatanggap yang dakal a kapuryan at karangalan karing pari migit kaya agyang keta pang kapanauna’na. Ing banal a pamilutlutan da, i’Capitan Tiago at iting matwang mebalu a pepamanan da ring kapatad na’t pisan, maging maragul yang pakinabang king pisamban. Katulad na ning pamilaban da ring maki saken-danuman Kapampangan a makakayap karing maldang maglayag. Nung i’Capitan Tiago munye yang tukud a pilak a kipnwan esmeralda at topasyu kenu mang Virgen, oyta na i'Dona Patricinio, pagawang tukud a gintu a kipnwan brilyanti king pikabalwan a plateru Gandinez. Nung king limbun ning Virgen del Rosario pepatalakad yang arkung mingatba arap at makabalut imalan a makapilegis at penagawlan salamin, lobung
