Maranun lang sinimba itang abak a ita i’Tya Isabel at i'Maria Clara. Iti magara ya piblas, ing rosaryu nang asul makakalikat yang anti mong pulsera at ing dara makasalamin yang mata ba'neng pangadyan ing novenariu nang Ancora de Salvacion kabang papakinabang ya ing pari.
Halus kalisya ning pari king altar, ing dalaga maliswas neng muli. Magmulala ya ing dara at mamwangit uling ukula’nang banal ya ing pangunaka'na at masipag yang mangadi anti mu mang metung a madre. Bubulung at mangurus tinikdo ya ing maganakang matwa. “Bah! patawara’na ku ning maganakang Dyos uling Ya balu no ring pusu ra ding dalaga migit keka, Tya Isabel,” ngana sanang sumabi ba’nang pututan itang mabangis nang palsalang anti mong pengari.
Kaybat dang megalmusal, bilang pamatad inip, i'Maria Clara tehi ne ing metung a sutlang suput kabang ing dara liligpit na at lilinisan ing sukal ning milabas a sayahan at mamagpag ya king tala’nang pakpak. I’Capitan Tiago lilisu na no man at babasan ding papelis na.
Ing nanu mang damdama'nang ibat king dalan, ing balang saken a lalabas, pakarugan de ing malinis nang pusu ning dalaga at pagalgala'ne ning kapikakunwan. Balamu wari bisa yang magbalik ketang katahimika’na ning beateryo at makisalamuhang pasibayu karetang kakalugura’na kilub. Karin malyari neng tanggapan alang pamikunut, e gagalgal, alang karug salu. Dapot .. . e ne wari kakaluguran at kekyalung inyang maintang la ? E la wari mirungut na king myayaliwang pyalung-anak at mipapagkamwa pa nung misan? Ing makapauli king sablang
iti e ku sabyan. Ikang babasa
