At anti ning ing bayntau kapatad nya namang Kain
balu hang Hindu ing kutang inya nganang mekibat
maki ditak a kalaraman:
"Malyari ra kang kalingwan?” nganang bihag makalawe karetang matuling nang mata. “Malyari ku waring magkulang king metung a sumpa, king metung a kabanalbanalan a sumpa? Akalingwan mu ne itang benging. . . itang kabengyan a bubugbuga’na ning masikan a bagyu inyang ika tatangalan mu kung dilidiling tatangis siping ning bangke nang indu ku, linapit ka at babo kung pago telan me ing maganaka mung gamat, yang gamat a e mu pepayntulutan mang talnan ku ketang minuna, at ngamu kanaku: “Ika kewalan kang metung a indu kabang aku e ku mika atin kapilan man.” At kaybat diname kang tinangis kaku. Ika liguran me i'indu ku at ya man pepakamala’na kang anti mong anak na. Kilwal, lalagusgus ing uran, manuldul, kikildap, dapot kanaku balamu wari akakit keng titiman itang maputla nang lupa ning bangke! Oh! nung mabye la sana ring pengari ku at atangalan da kang makanyan. .. Kaybat, inabut ke ing gamat mu at ing gamat nang indu ku at karin simpa kung luguran da ka, iduyan king ligaya, nanu man ing kalmang ipagkalub na kaku ning malam a banwa. At anti ning itang sumpang ita e ya meging sabagal kaku kapilan man, ngeni ulitan ke at babayu keka . . . ! Makananu ra kang kalingwan? E mipda ing larawan mu king kaysipan ku kapilan man at nu ku man karin; yang meging talapagligtas ku king panganib ning pamaglakad ku; ya ing minye kislap at diwa king malungkut kung pamagdili-dili karing bansang darasan ku; ya ing minye sikanan kaku ba’kung labanan itang malumeme nang panyulung ning Europa a pakalingwan karing dakal tang kalahi king gintu nang payntungulan at panenayan ning Pilipinas. King kakung paninap akakit da kang makatalakad king pangpang ning Menila, makalawe karin, ketang marayu at makabalabal king malabug nang sala ning marimlang galingaldo ; daramdaman ku kanita ing malungkut at maginakit a dalit a gigising king matudtud kung panamdam at king kaysipan ku babalik na ning pusu itang mipdang kayanakan, itang pyalung tang anak, itang tulang alang malit, itang anggang masiglang milabas a dininan mung kule
at legwan kabang ati'ka king balen. Kanaku kanita,
