At nangan king marayu ing dayat malat...! Kasumangid pangpang karin ya ing Europa, nganang mimisip. Ing Europang panuknangan da ring masaya nang memalen, itang Europang alang tigil gagalo magdulap kaligayan, maninap balang abak at malsimi naman potang kuldas ne ing gatpanapun, maligaya ya rin busal nanu mang kabigwan. Wa! lipat na nitang malagwayan a dayat malat karin la ring bansang maniwala king Dyos, detang bansang e sasanggalang king panyulung da’t pangataluktuk ding tau, detang bansang deta mayap lang labis kesa karetang magbansag talapagligtas ding kaladwa!
Dapot itang pamigunam a ita mebating king kanwa’na inyang abatyawa’ne ing bunduk-bundukan king ilang ning Bagumbayan. Itang malating bunduk a magdilidili lele ning Luneta ya ngeni ing minaus king pansing na at inagkat neng mibule malalam.
Aganaka ne ing metung a lalaking mibusni karing mata na, minye sala king kaysipa'na at ya ing pepakilala kaya king tuntun at matulid. Nung king bage, e dakal ing pamalak a bibu na kaya dapot bungang-ukul a e na apakulimlim ning makailo nang tindug ning Pamanyulung. Itang lalaking ita metung yang matwang pari at ding amanung sinabi na inyang mamun ya kaya daramdama. 'nong papantig pa king panamdam na. “E mu kakalingwan nung ing kabyasnan pibandya'ne ning ketawan, ila mung malyaring mimana kaniti detang ating pusu.” Iti yang pepatanda na kaya. "Pigkapilitan kung ilipat keka itang tiru da ring kakung guru. At itang kayamanan a ita inimut kung digdagan ba’kung lakwan naman karing tutuki keka at yan malyari mung aragdagan pang labis uling maglakbe ka karing bansang mayakayan,” at tiglung nang makatiman: "Ila manintun lang gintu, ayan mu la at mayntu’na ka mang aliwang gintu uling iti yang tune tang kaylanggan! Dapot tandanan mung e balang kikinang, gintu.” Ketang bunduk-bundukan a ita karin ya mete itang pari.
Kaniting anggang aganaka na, nganang bubulung makibat king kayang sarili. “Ali, nanu man ing malyari, mumuna ing Balen, mumuna ing Pilipinas, anak ning Espana, mumuna ing balen ding kastila! Ali, nanu man ing inatul ning kapalaran e malyaring munye musing
king Indung Balen, ali!
