agpang king nung ninu ing familiang mag-Ari Madrid.
E na pikabyang ing banglu ning chocolati agyang ita
pang kalantug ding kahun at kalaksing ding salapi a
manibat king tanggapa'na ning talaingat bandi at
kaybat nang pekibatan itang magalang at mamung puge
na ning kapatad a Procurador, menik ya i’Fray Sibyla,
lebasa'no ring mapilan a pasilyu at tinuktuk ya king
metung a pasbul.
"Malaus ka!” nganing metung a maynang siwala.
"Ipayntulut na sa ning Dyos ing kumayap na kayu!” nganang memuge Fray Sibyla kalub na.
Makalukluk ya king metung a tabureting maragul ing matwang pari, menakmul a pisngi, magkule dilo, katulad da reng santus a ginulis nang Rivera. Melalam no ring mata nang papandungan da ring malabung nang kile at iti yang babye pang sala karetang maginhalu nang mata. I’Fray Sibyla pegumasda’neng malulunus at kaybat nong pikurus ding takde na king eskapularyo nang Santo Domingo, dinuku ya at menayang e bubulad.
"Ay!” nganang mengisnawang malalam ning masakit. "Inusuk da kaku ing pa-opera. Hernando, patastas k u pa king twa kung ine? Ing balen, ing makatakut a balen a iti! Sukat na kang mimingat king ikit mung milyari kaku, Hernando!”
I’Fray Sibyla minatna yang pakakalale at linawe neng maratna ing salunan.
"At nanu ing linutas yung daptan?” nganang kinutang.
"Ing mate! Ay! Nanu pa ing malyari kung daptan? Tutu na kung magkasakit dapot daka'la naman ding pepasakitan ku. .. mamayad na ku mung utang! At ika naman, komusta ka? Nanu ing balita?” "Dinatang ku ba'kung sabyan'kekayu ing penabilin yu kaku.”
"Oh! mipakananu?”
"Sst..."nganang buysit mekibat ning paring anak at mwa yang melikid sumangid. E katutwan ing selita na kekatamu. I'Ibarra metung yang taung maingat, e ya mangmang dapot ukulan kung mayap yang anak.”
"Makanyan ing paniwalan mo?”
"Nabengi migmula na ing pamisunggalit!”
