- Manyagsag kayu at manyakup
- (Bayung Machiavelo)
Ninu ring masikampu ning balen?
Aliwa ya i’Don Rafael inyang mabye ya pa. Bista man ya ing mabanding dili, dakal ya gabun at halus ding sabla maki utang lang lub kaya. Anti ning pihikan ya at e na pagparangalan ing nanu mang depata’na, kapilan man e ya mitalakad pangkat na king balen at ikit ta na nung makananu lang tinalakad laban kaya kabud atimalad deng migalanganin inyang mibili ya king maskup. Aliwa naman kaya i’Capitan Tiago? Neng daratang ya karin, sasalubungan deng musikus ding maki utang kaya, pagsadya reng pamangan, at kakatmwan deng lamak. Ding pekamanyaman a prutas yampang do king dulang na; nung akapara’ne ing masanting nang kabayu ning maki utang kaya, kaybat namu ning kapitnang oras atyu king kabalyerisa na ing kabayung yan; tutu ngan yan dapot kaylyan dya mu at king e na daramdaman awsan deng Tiagung munisilyus.
Marahil ing Pun-Balen (gobernadorcillo).
Dapot ing taung ini naman makalunus ya sukad. Kanwari pekapun ya dapot e makayutus, ya pa ing utusan. E ne asabyanan ing ninu man, ya pa ing sasabyanan da. E makatangka nanu man nune gagawan dyang kasangkapan. At ya pa ing makibat king Alcalde Mayor king nanu mang peparapat da kaya, inutus o tingka, anti mo waring ing sablang iti menibat ngan king sarili nang munikala, dapot malyari tamung sabyang king dangala'na king itang katungkulan a tatalna’na e na penako o simsam kaninu man uling kaniti
ginugul yang limang libung pesus at dakal a kalibakan.
