at inyang balamu ing panintuna na e ne atuklasan,
mengulurun ya kile, minatna ya't maglalawe misusumangid,
kaybat tinikdo ya at lepita'ne ing bante.
"Oy!” ngana. Ing bante minatna ya.
"Balu mu nung nu ya karin itang masanting a bungung kalupa. na ning lama’ning ungut, alang kulang a ipan a binili ku ketang bitis ning krus lalam da retang bulung a reta?”
Ing bante tinas na la mu ring adwa nang pago bilang pakibat na.
"Oyni,” nganang tinuglung ning matwa at pepakit ne ing kwaltang pilak. "Ya mung kwalta ku ini dapot ibye ke keka nung akit me itang bungu.”
Ing kislap nitang salapi pepaysipa’ne, belikda’no ring bungu at nganang kinutang:
"Ala yu kareta? Ala yo? Nung makanyan e ku balu nung nu karin ya! ”
"Oyni pa,” nganing matwa. "Ustung mamayad la ring maki utang kaku dagdagan ke pa ini. Balu mo? Ing panintunan ku bungu ne ning asawa ku inya nung akit me. . .”
"Nung ala yu kareta, e ku balu nung nu ya karin. Dapot nung bisa kayu dinan da kong aliwa . . .”
"Kalupa ra ka reng aun a kukulkulan mu...” nganang memyus ning matwa. "E mu balung kababatingan kang maragul. Kaninu ya itang kulkul a ita?”
"O nang male ku ! Keta yang mete!” nganang pabusaktung mekibat ning metung.
"Kalupa ra ka pin deng aun, kalupa ra ka pin...” nganang minulit makisamut king ayli nang malangi. "E mu balu ing susubu mu at e mu balu ing yapsa mu ! Sulung kulkul ka, mau'na ka!”
At ginulut yang papunta king pasbul.
Ayari na no ning bante ring pagobra'nang adwang aun a timbuna'nang mamasa-masa at malare gabun. Kinwa ne king tuning na ing kapirasung luyus, sinubu ne't lengut at saka na pegumasdan ing malilyari king makapadurut.
