Lalawa'neng mipnung lungkut Ibarra.
“Ah! wa,” nganang tinuglung, “atatandanan kung atin pang batu siping na. Ing aun makuyad ya pang bagya at anti ning kanita ing mangutkut masakit ya, metung yang kasamak ing misundung kinulkul. Maya'pa ikutang tamu kanyan nung ninanu ya ing krus.”
Lepitan de ing mangutkut a makapamulalang magumasid karela.
Leko ne niti ing tuning na at pigaya'na la. “Malyari mung sabyan kekami nung isanu ing aun banda keta a maki krus sana?” nganing utusan.
Linawe ne ing lugal ning mangutkut at saka ya minisip.
“Metung yang krus a maragol?”
“Wa, krus yang maragul,” nganang matulang tatangu ning matwa at lalawa'neng masaya i’lbarra. Iti naman mika diwa ya.
“Itang krus a dinukit at tinaling yantok? nganang minulit ning mangutkut.
“Ya pin, ya pin ita," nganing utusan at ginulis ne king gabun ing metung a krus a katabas ding karin Bizantina.
“At king aun atin pang makatanam a bulaklak?”
“Wa! Adelfas la, sampaga at no-me-olvides. .. Ya ita," nganang maligaga ning utusan at dinina'ne pang tabaku king tula na.
“Sabyan myamu kekami nung isanu ing aun at nung nu ya karin ing krus. .
Ing mangutkut ginamus no ring balugbug na at nganang mekibat manuyab:
“Itang krus. . . o silaban ku ne e..
“Silaban? O ba't silaban me?”
"Uling ita yang inutus na ning matabang pari .. .”
Tiniman ya ing sepultureru.
"Ninu? Yang mapamarug, ing Padre Garrote.”
Tinukup neng Ibarra king metung nang gamat ing kanwa'na.
“Mekad naman malyari meng ituru kekami itang aun. Marahil e me pa kelingwan.. ."
Tiniman ya ing mangutkut.
