"Ing mete ala ne karin,” nganang mekibat alang kapikakunwan.
"Nanu ngamo?"
"Ing dimdam yu,” nganang balamu manuksu pa.
"Atin pamung paruminggu ngeni metung yang babai ing kitkut ku ketang aun na. .
"Mamulang ka?" ing kutang ning utusan. "Ala pa mang pabanwa inyang ikutkut miya.
"Makanyan pin uling ati’nang mapilan bulan inyang inaun mi neman. Ing paring mataba yang minutus at pakutkut ne king kampusantu ring intsik, dapot uli ning mabayat ya at mumuran pa. . .”
E na alud man ning tau ing buri nang sabyan. Mengapaurung yang misdan inyang akit neng bubusuk daralusung i’Crisostomo. Sigpwa’ne, sikmal a takde at saka ne pengulug.
“Depatan mu ita?” nganang kinutang miraralakdak Ibarra.
“Gino, e ko pu mimimwa,” nganang mekibat maputla at gagalgal. "E ke pu kitkut king kamposantu ring intsik. Mayap na ing malumud kesa king makisamut karing intsik, ngaku king kakung sarili, inya inugse ku nya king danum ing mete. .
Sildak no ring adwa nang kamaung Ibarra karing pago ning mangutkut at linawe neng malambat kanyang paglalawe e ra alarawan ding amanu.
"Metung kang alang kalmang tau...!” ngana at saka ne mabilis meko. E na no pikabyang pindamusak ding butul, aun at krus, anti ya mong mamulang. .. Apisa’ne ning mangutkut ing takde nang mesakmal at nganang bubulung:
"Lon mu ing pasari da ring mete! Ing paring mataba pemastu'naku uling kitkut ke agyang masakit ku. Ini naman migsu na naku pikli takde uling inaun ke. Makananu kang magbili karening kastilang deni! Mekad mu, milako ku pa kapanintunan king milyaring iti..
Masalusu ya lakad i'lbarra. Makalawe ya king marayu kabang tutukya'neng manangis ning utusan.
Lalbug ne ing aldo. Ing makapal a lulam papampana'ne ing banwa banda king aslagan. Ing manyapul-
