kawayangan to, ya sayan too nipawil ed abong to, apawil to
ray ának to, apawil toy asawa to tan nilaban pa lági amin a
boleg to ed masegsegang ya arapen."
Insan to tinapoktapok imay kajon tan:
"Wadiad sayan maletak a singa bilang diad maleta na saray doktor," kuanton inkasil ed pikewet a tagalog; "so bilay tan patey, samal tan tambal, tan sayan sankaakop ya ankabli ran bató masarasarag lan pangilereg kod amin a manaayam ed Pilipinas ed kasegsegangan."
Nengnengnengen dan amin a napno ray takut ta amtaran tuay ibábaga to. Nabalawan dad bosis toy sansananey a tanol tan singa ontatalus so makakebiew a dalang daray matá to ed samay inanagan a salming to.
Ta pian lági nabalang so inkatalagnaw da ran man a yanoyanon panagnunot a totoo ed saramay imbalikas to ran salita, si Simoun, inaon to may bandeja pian nanengneng da may karaldaleman a pasen ya anginan to ray sancta sanctorum1 odino papablien ton maong.
Wadman iran nandarasig a sinasaletsaletay kapes so pananginay alajas a nambabangil iran nengneng na katat a lalapod Rusia, ya apanatan dan amin imay karaldaleman a pasen ya inapisay peluz a gris. Amin day wadman manaalagar iran makanengneng na makapakelaw. Samay asawa nen Sinang tatalaranan toy pakanengneng to ray karbunklo, ankablí ra yan baton mansibsibuag na apuy tan mandarlang iran anggan wala rad utel na kabilungetan. Say liknaan nen Kápitan Basilio singa la akarateng ed pintoy bilay ya andi anggaan; namuria to lan siansiay díli to ran matá so abayag to la ran pikugip a pantintindekan.
"Saya ay kuentas nen Cleopatra," kuanen Simoun a dinemet ton kinalkalnaan so sakey a kajan palanas a singa bu lan a pisag; "sakey yan alajas ya ag nibagay bili to, yaatol ed museo ya sa labat angankoy makasaliw saray Gobierno ray bansan mayaman."
Sakey yan kuentas a balitok a nantotuntonan ya ankekelag iran anito ya sinaletsaletay balangobang iran malabo-
___________________
1 Pasen a bandad paway, kasakbayay pakasabi ed sankalooban na tabérnaculo ya inggangay Dios ya ipaalagey nen Moises ed kawalaan dan kalawakan ya iba to ray Israelaitas, tan ontan met diad Jerusalém, ya akasián a kineteg na abel ed samay pasen a kaaraldaleman ya ingaray santasantorum.
