Say Sankatageyan a Kapitan General tan Gobernador na Kapoloay Pilipinas, sanagew lawarin anganop ed Bosoboso. Balet ta manlápod nakaukolan ya ulopey banday músiko,..... ta diad katagey na kipapasen to lantí et ag nayarin onsaginonor ed saray ililibot a talintao.....tan manlápod agni nikayat so liket ed pandengel na tugtog ed saray olsá tan animolok ed Bosoboso, si Sankatageyan a Kapitan General, ya iba toy banday músiko tan mapalet iran kikalayukoy a papári, sondalo tan empliados, ag akalay anggan saksakey ya utot ono manok.
Saray manonaan a mamakauley ed lúyag singa dala sankanengneng a walaray nackal ed betang odino nauman ed kipapasen; sara kalamor so kápitan tan saray anakbanwa mapagpaga ran ag akaugip, ta natátakut iran onseksek ed uló ton may mangaridios ya umaanop ya isandi tora ed saramay ag mangitaltalek ya ayep ed katákelan, a singa ginaway sakey ya alcalde1 ed imbeneg iran taon a nanbaroy ya impasakbat ed abála ray totoo ta anggapo ray narumog a marunong a kabayon napangipiyaan toy laman to. Wala met ladtay maliket a manggúlo ya akanunot ya angiesaes a si Sankatageyan a Kapitan General et talagan walay gagala ton gaween ta nanengneng tod saman ya inkagawa so gapogápoy sakey a labay day totoon yalsa ed Uley ya nakaukolan a sebseban a tampol pian agla onkayat, tan sakey ni say impanganop ton anggapoy nala ton anggan anto napaabeba toy galang day kakastila, etc., kanian nonunoten dala no siopa kasin masegsegang so nayarin isubon napaunong.... Tan maong ingen ta diad sankabalgan a panangasi nen Kapitan General, ya anggapoy narumog nen Ben Zayb a makaná ran salitan pangidayew, et pinapás tora yan amin a pagpága ed impangibaga ton diad katuaan mairap so linawa tod pakapaunong tod saray ayayep ed takel nisesengeg labat ed liket ton manganop.
______________________
1 Gobirnador.
