"Makapoy ak lantin manugal na tresillo," kuantonia ya manbatak tan kinmobibit.
"No ontan sirin si Simoun," kuanen Kapitan General; eh, Simoun, eh, mister, labay yoy onyurong?"
"Antoy apaabig yon nipaakar ed saray armas ya ikakana labat ed sport ey?" kuanton may sekretarion tinmepet ya sinambot toy impakatonday sugal.
Indonglaw nen Simoun so uló tod man ed pinto.
"Labay yon sandiay pári Camorra, sinyor Simbad?" kuay tepet nen pári Irene; "nayarian yoy mangiteen na brillante inbis a picha."
"Nayari pa," kuanen Simoun a sinmingger a papagpagen toy tisad lima to; "antoy iteen yo balet ey?"
"Antoy iteen mi?" kuay ebat nen pári Sibyla; "si Kapitan General nayarian ton iteey labay to, balet ta sikamin papári....."
"Bah!" kuanen Simoun a sinmalabat a napnoy pasíki; "sikayo tan si pári Irene nayarian yon ibayar so gawa ray panangasi, dasadasal, kasimpitan, anto?"
"Amta yo met balet a peteg a saray ugáli ran masuri na sakey a too" kuay pári Sibyla ya mabinbinta, "et aliwa ran singa saray brillante ya nayari ran panbabalesay totoon ilako.....Saray ugáli ag ira nasiyan ed akan ugáli, awitawit tora.....
"No ontan sirin labalabay kola no bayaran yoak na salita," kuay ebat nen Simoun a malikeliket, "sikayo, pári Sibyla, inbis a bayaran yoak na limay pisos ono antodtan, onia bilang so ibaga yo ay: 'Italirak kon limay agew so kapobrian, kaoya- moan, katutúlok,.....tan sikayo, pári Irene, onia ay: 'Italirak koy kaadiaan, dangka, etc..... "Nengneng yopa lanti no ag sankainomayan ed sikayo ra, insan siak et brillante ray ibayar ko!"
"Nidumaduman too yay Simoun, nambabangil iray onseseksek ed uló to!" kuanen pári Irene ya manelek.
"Tan saya ay," kuanen Simoun ya intuloy a tapoktapokey takeb nen Kapitan General a singa kalkailuaman ton maong, "saya balet ay bayaran toak met na limaran.....iyan la bilang a limay agew odino limay bulan a panpiriso, sakey a ganggan a pangipaalis ya siak so mangiay labay kon ngaran, bi-
