lay da.....Say isip yo kasi so no say naplagan ko et lima
ray.....yanko lan sikayo bilang, inbulos yoak kasin agyo inalay anggano sankaraisetan lay kapalduan alajas ko?"
Onebat lawarid sayay Don Custodio ya onsumlang; mapalalo met lay kabastosan tonia nen Simoun, sakey a mestisoy amerikano negro ya nalálabas toy agto pangitaltalek tan pi nunuyan toy impikaaro tod Kapitan General a pamapabaing tod kinen pári Irene. Tua met balet ya anggano sikaton díli akoen ton no diad lima nen pári Irene naplagan nen alajero, aliwa labat lan samay inala ray tutulisan so aleen to.
"Say kaugsan," kuanen Simoun ya intuloy, "andid saray tutulisan ed kapalandeyan tan pasen iran matalag a bakat; say mauges saray tutulisan ed kabalbaleyan tan saray siudad....."
"Singa sikayo," kuanen pári Irene ya manelek.
"On, singa siak, singa sikatayon amin no ibaga tayo labat so tua, ta anggapo met diay indion makangel ay," kuay Simoun ya intuloy; "say mauges ditan ta maamot so inkatulisan tayo; diad agew ya omparungtal itayon tutulisan ed matá ray katoowan tan ompaway itilan manayam ed saray katákelan, diad satan ya agew nalinisan a nilaban so bansá, diad satan ya agew onggapón nagaway togiop day totoo ya sarag dan asikasoey inkasikaran díli..... tan si Sankatageyan a Kapitan General ed satan nayarian tolay misugal a mareereen tan agla nakaukolan a gunagonen nen sekretario to....."
Si sekretario manuwab ed saya ya inonanat toray taklay to ed tuktok na uló to, tan ontan damet na sali to ya anggaay nayarian to ed silong ton may lamisaan a melag.
Kanengneng dad sikato, inian dan amin so elek. Labay la nen Kapitan General a pultoten iman a tungtongan, kanian inikbanan toy susuksuken ton nipis tan inkuan ton bintaan, balet imisimisan met:
"Siala tan, siala tan! tondaan yo la tay lurey; mankimey itilay susto, ambegian wala ni kapalduay oras kasakbayay almusal. Dakel so asunton nakaukolan a sumpalen?"
Sitatalineng iran amin. Onggapod saman nimet ya agew so petepeteg a tulot nipapaakar ed panbangat na salitay kastila ya sikatoyay makasengeg a pigay agew laran wadman di pári Sibyla tan pári Irene. Amtala ya sayay inmona manlapod inka Vice Rector to ed Santo Tomás, sumpad sayan kanunotan, sa-
