"Ekalen!" inulit nen sekretario.
Akasibeg si atagey a betang ya cmpliado ed nidatngan ton kapalaran niman a masegsegang, ya anta onkekerew na tulong kalamor et naekal lainged anapan to, kanian sinalsáli ton tulongan.
"Tua met balet," kuanton singa nasisikig, "a makulang so kakaasikasoy panagbangat.....
"Dakdakel lay inabuloy kon pilak ya ingganan pansaliw na ikakána," kuanen Kapitan General ya agmangitaltalek, a singa bilang labay ton ibagay: "Ginawak lay mas nen say kanepegan ko!"
"Balet ta manlapo lantid anggapo ray maong a pasen a napanginan, nadadardarak iran nadederal....."
"Agmet nagawaan ya amin a manbabansag!" kuay ebat nen Kapitan General ya amagamagá; "makapoy itay saray managbangat dia et nakaukolan da ni mababig iran pasen a panbangatan anta saray mamaestro ed España et ompapatey irad eras. Masiado met la, napapalakbatan dalay dílin Inan Bansá!"
"Say panagbusol ed Inan Bansá……………”
"Panonaanen so Dálin tin nianakan! Panonaanen lawas so inkakastila tayo!" kuanen Ben Zayb a mandarlang iray matá tod panangaro ed Dálin ton nianakan, balet ta binmalangay lupa to nen anggapoy inmesel ya inmabubon ed sikato.
"Manlapod natan," kuanen General, "ekalen ya amin iray mankija."
"No say kanunotan ko et naako komon," kuanton impalaran nen Don Custodio ya singa mansasalitan bukor.
"Nipaakar ed ipaalagey iran eskuilaan?"
"Yanoyano, mainomay a gaween tan aliwan magastos a singa amin daray kanunotan ko, unong na naaral kod andukey lan panagkimey tan pikakabat kod bansa. Walay eskuilaay binaley báley ya ag nagastosay Uley na anggan saksakey a kuarta."
"Amtamila," kuanen sekretario ya nantarok na balaw; "pasouten iray binaleybáley a mangipaalagey na eskuilaan dan díli."
Inyan dan amin so elek.
"Andi, aliwan satan!" kuanen Don Custodion akaingal ya abaingan tan binmalangay lupa to; "impaalagey laray nayarin
