panbangatan, tan say makulang labat say pangikana; malinlinis, sankaabígan, magmaalindaway....."
Apagaan iramay papári ya mannenengnengan iran piripiri. Anto, kanunotan nen Don Custodio kasi ya panmaliwen ya eskuilaan iray simbaan tan konbinto?
"Nengnengen pa!" kuanen Kapitan General a kinmoliseng.
"Sankainomayan, kagalang kon General," kuanen Don Custodio ya inmalagey tan pinalongog toy bosis to ya singa bilang manatalumpati, ono mansasalita ed atagey a doipoan; "saray ugugaw onloloob ira labat no agew iran panagkimey, tan sara balet so bulangan ikakana ra labat no simbá tan agew na pista....No ontan sirin nayarin ikana ray bulangan ya eskuilaan ya anem agew ed sakey simba!"
- "Ay saló, saló, saló!"
- "Inggawa to!"
- "Sansananey iray nanonunotan yo, Don Custodio!"
- "Agay latan a kanunotan a, makapalpalek!"
- "Sikatoya labat so manalo ed amin laray inmonan kanunotan yo!"
"Maya kipa balet, kagalang kora," kuanen Don Custodion inkasil ed impakangel toy nambabangil ya imbabaga ra; "Nunoten tayoy makaná. Antoni mas maong a pasen nen saray bulangan ey? Ankakabaleg, maong iran inkagawa tan anggapoy kakanaan dan sakey simba. Anggan nunoten ni kaabigay walna, sayan kanunotan ko makanakaná, on: ompasen a singa bilang sinimban panlínis ono pamunas iray makapoy iran gawa tan panbayar na mauges iran nagagawa ed simbaay sugalan. kuantayo la bilang."
"No arum balet et walay bulang anggano lawas," kuanen pári Camorra, “tan makapoy met no anta manbabayar irad Uley so mangokontratay bulangan et.....
"Satan labat manaya! Ag ira paurongey ugugaw ed saratan ya agew!"
"Saló, saló!" kuan lamet nen Kapitan General a singa akangel na makapakasalanan; "ag itan nagawan kaugsan legan kon manouley; ag ira paurongey manaaral ta piano walay bulang! Ay saló, saló, saló, agak ni akanengneng! Onekalak nin onona ed bebenbenan kon betang!"
Tan say itsura nen Kapitan General singan tua akangel na makapakasalanan.
