"Nunot yopa balet, magalang a General ko, magmaong ni nakapotay eskuilaan a pigay agew nen say nakapotan a pigay bulan."
"Balet ta sungpa tan ed maptek a panagnunot tan kagagáwa!" kuanen pári Irene ya lalo ni sanok to nen si Kapitan General.
"Lalon sungpad maptek a panagnunot tan kagagawa so walaray balibalin abong na bisio et say aral et, anggapoy abong to.....Nakaukolan a nengnengen tayoy makanad kurang na panagbilay ya aliwan say liknaan tayoy manonaan. Diad polítika, sankaugsan met lan nagawa no say tumboken tayo labat et say liknaan. Nengneng yo, ta piano anggapoy nibaga rad sikatayo isesebel tayoy pantánem na apian ed saray ouleyan tayo. ran bansá, balet ta papaulian ti met so panapian day totoo ed sarayan bansá, kanian say kasusumpalan to so anta agtayo napapaer yan mauges a gáwa, ompopobri itayo..
"Nengneng yo met balet ta pakákalmoay Uley itan ya andin sagpot na masulok ya apat a lasus tan limamplon liboy pisos," kuanen pári Irene ta ompapaway a manpalaloy kagagampi tod Uley.....
"Siala tan, siala tan, kagalang kora!" kuanen Kapitan General a pinaer so supiatan; "walaray kanunotan kon díli ed satan a pamankaran, tan aasikasoen kon maong so pakaaral day karaklan. Wala ni arum?"
Samay sekretario pinasekiapan toy matan nantarok na pagay pári Sibyla tan si pári Irene. Saya la man! Saramay dua ran pári nanparaan ira.
"Say kerew day estudiante ed pangiabuloy na panlukas na sakey ya eskuilaan a panbangatay kastila," kuay ebat nen sekretario.
Singa aguló ray daiset iramay totood mad salas, tan kayari ran nanlilimgisan, sankanengneng dan amin si Kapitan General a singa bilang labay dan basaen ed lupa toy kanunotan to. Anem bulan lan saman a kerew et manaalagar na tutól a wala laray pulok na totoo ya panmamaliwan ton casus belli1 Akausdong si Kapitan General a singa bilang agto labay a nabasa rad matá toy kanunotan tora.
__________________________
1 Makasesengeg ono panlalapoay kulkolan.
