Abaybayag a keneng a singa la makasikig, tan oniay atalusan nen Kapitan General, kanian;
"Antoy kuanyod saya ey?" kuay tepet tod samay atagey a betang ya empliado.
"Antoy nikuan ko ey, kagalang kon General," kuanton may tinepetan a sinintak toray abalá ton imis toy ampaipait; "antoy nikuan ko no agta makanepegan a kerew, sankamakanepegan, tan singa pankelawan kon akaukolay anem bulan ya impannunot ed saya....."
"Onaa ta walaray nakalamit ton manepeg a simbangen," kuanen pári Sibyla ya ambetebetel, tan pinakuyep ton inkolirep iray matá to.
Sinintak tora lamet so abalá ton may atagey a betang ya empliado, ya singa bilang agto natalusan no anto raman a nakalamit a manepeg a simbangen.
"Anta andi la lantid panaon," kuanton intuloy nimay dominiko, "tan andibali ni nayarin ibagan singa napapalakbatan kami ed saray gendat laran impagamor ed sikami...."
Si pári Sibyla agto nanmatalkan ya insumpal no agta nilimgis toy Simoun.
"Sakey itan a kerew a makapainap," kuantonia ya akilimgisan ed kinen dominiko. Saya kinmirem ya amidua. Ag linmabas ed kinen pári Irene rayan amin, tan nakalan lay ilalo ta atalusan ton sungpa met si Simoun.
"Sakey a katotongangan mareen, sakey ya yalsad Uley ya inlugan ed sobren sinilyoan," kuanen pári Sibylan insumpal.
"Yalsad Uley, itonganga?" kuay tepet ton may atagey a betang ya empliado ya panbabalesen toran nengnengen a singa agto natatalusan.
"Saray mangipapangulo pigaran tubonbalo ya nababalitan magabay a manguman na onkukurang ya uley tan mapalakbat iran panagnunot, no agla salitaen diay arum," kuanen sekretario ya sankanengneng to may dominiko.
"Sakey ed sikara mangaray Isagani ya singa walay kiduakiduas na uló to..... kaanakay sakey a kúran párin andeket....."
"Babangatan ko tan," kuay ebat nen pári Fernandez, "tan anggapopay barbaraan kod sikato....."
